Wednesday, July 9, 2008

إنتف

على هذه الصوره اللي تحر mellow أشكر الأخت


أعتقد أني أكثر شخص كتب قصائد عن الصلع وطبعا هذه نتيجه طبيعيه لما أعانيه
في هذا اليوم ذهبت الى احد المطاعم وشاهدت شخصا ماشاء الله شعره عكس شعري بالضبط يعني يصك على ميسي لاعب برشلونه المهم طرا في بالي سؤال لو ركبنا معا بسياره كشف ماهو الشئ الذي يحسه هو وأنا افقده هو سيحس بمرور الهواء بين بصيلات شعره (راح الريال ) وأنا احس بنفس احساس ارتطام الهواء بتجوري
من كثر ماقلت ابي شعر قمت اتفنن اللحين ابي سياره كشف
وهذا انا شكثر اقول ابي واخرتها انا اللي صرت كشف

،،،،،،
،،،،،
،،،

أبي سياره كشف


*ابي شعري ينصف صف


*وأدوس حيل


وشعري يطير


*وأحضنه بالجف


أبي سياره كشف


،،،،،

أبي جو معدله 14 درجه مئويه

ابي قذلتي تأذّي الطيايير أذيه

بإختصار أبي شعر
من انزل راسي

أحسه على خشمي


هَف


أبي سياره كشف

،،،،،،

أبي موتر يخلي شعري يطير


*أبي شعري بالسِّكان يشير


ليش شعري صاير


*إِنْــــتــــَفْ


أبي سياره كشف


22/06/2007


الجمعه






ينصف صف : أي يرتّب بطريقه متناسقه*

ادوس حيل : أقود السياره مسرعا*

الجف : أي الكف*

يشير : اي يعلق بمقود السياره*

إنتف* : تنطق بتسكين النون وتسكين الفاء والنتف هي القطع الصغيره ومفردها نتفه مثال : براك قص الاوراق نتفه نتفه وصاروا إنتف

84 comments:

على نفسها جنت براقش said...

صدقنى احساسك بالهوا احسن
بدون تفلتر

:)

بعدين انت توفر شامبو و مشوط

و ما يحوشك قمل

و ينشف راسك عقب السباحه اسرع

و بالليل اذا مشيت ما تضيع
اكو لمعه تصير بوقت البدر
:)

هممم بعد

شكلك جد و حكيم

JuVeNTiNa said...

عجييييييييييييييييييييييييييبه القصيده ..

Mamloo7a Q8ia said...

خنت حيلي يا براك
طلباتك سهله
باجر ناخذ لك موعد زراعه
;p
بس شلك بالقذله
اللي تأذي الطيايير ؟؟
ترى كلش مو زينه
:))
لا وعقب بالسكان تشير
لا لا كلش مو خوش

تسلم يا خوي
وسعت صدورنا

تراب الكويت said...

تقول إنك بسيط

وهذا السر

:)

الزين said...

شوف

الحين انت عندك شعور البنت المتحجبه

احساسها بشعرها معدووووم

:\

ماغير بس تلوفح بحجابها بهالحر

مساكين بناتنا عاد بدعوا بحجاباتهم من جدام لسان حالهم يقول فوق الخيل

والشكل العام يقول ياساكنين الهوادج


وخلها على الله

بس والله ابرد لك من غير شعر
تعال عاد شامبو غير نمونه وبلسم عقب وسوالف مالها اول من آخر

خلك جذيه اخيي اريح لك

:))))

خوووووووش نص

charisma said...

لووووووووووووووووووو
واى براك وااى ذبحتنى ضحك من الصبح
هههههههههههههههههههههههههههه
اشوه ان ما عندك شعر
شحالتك وانت شعرك ذروه شطوله ولالالالا بعد يشييير بالسكاااان
ههههههههههههههههههههه
لالالالا لالالالالالالالالالا مو زييييييييييين

وبعدين انت الشخص المناسب بالبيئه المناسبه !! انفه لك جذى وانا اختك
وبالشتا كبوس وماكو الا العافيه

ابدعت فيها
:)))

وصبااحك فل

mellow said...

أظنتي هذي هي القذلة المطلوبة
http://wallpapers.oneindia.in/d/119657-2/shahrukh-khan02.JPG

أضمن لك إنها راح تشير بكل شي

Gmashah said...

لااااااااا تقول !!! احساسك ماله داعي ترى !!!! اصلن كل ما صلع الريال كل ما زادو المعجبات ... صدقني حاليا انا صفيت بطابور معجباتك

lawyer said...

وااااااااي برااااك

ازرع ؟؟

ليش ما تزززرع

انزين انا عندي حل والله زيييييين

ينبت الشعر

ينباع في الصيدليات
تونيك اسمه سوريس
اهو فيه شوي ثووم بس بدون ريحه

ووووووووالا تعال اقولك ليش ما تحط ثووووووم

مممممممممم

ازرع براك احسسسسن

Selezya said...

هههههههه

ياحراام
ههههههه
والله مادري شقولك
مشكله !
ماكو فايده حدك متععقد

Яeema said...

looooooooooooooooooooooool


ambeeeeeeeeeeeeeeeeeeeeeeeeeeeh


مجربه شعور الصلع يوم أنا صغيرة
هاهاهاهاهاها
بس التكتكت على الويه شعور أحلا


أحرك زياده؟؟؟

بالبحر و تنفض الماي عن الشعر
الله

هاهاهاهاهاها

mellow said...

لوووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووول

واي أمبيه ما توقعت يوم فتحت مدونتك

قاعدة أضحك بالمكتب بروحي جني مينونة
أشوه الموظفة إلي معاي طلعت استئذان

بغيت أحط لك أكثر بس خفت على نفسيتك
(بالأحرى خفت على شاروخ خان من عينك)

كويــتي لايــعه كبــده said...

طلباتك زادت
:)

تبي "شعر مسبسب شعر هندي" (خابر الاغنية؟)
وتبي موتر كشف
وتبي جو حلو

الواقع يقول...
دير بالك من الشمس على الراس البلاط
وسيفتي أكثر انه ما في شيء يشير بالسكان
:)

اللي شفته بالمطعم يمديه راح فيها

فريج سعود said...

ابي براقش قاعد تواسيك ولا قاعد تضغطك ؟

Mohammad Al-Yousifi said...

سيارة كشف ماكو موجودة

بس الشعر من وين أييبلك؟

honey said...

إتقلب إصورك مرتاح


اليوم و بعد عشر سنين الشكل نفسة


ما يضيق خلقك على شعرة طاحت يسار و لا يمين


ما تقول كبرت و شعري شاب و بانت علي السنين

5roofa said...

لووووووووووووول

امبي مادري ليش تذكرت طارق العلي بكل مسرحية يتحسر على شعره لوول

Lool

salamz dear....

Super Woman said...

لوووووووووووووووول


افتح مجله الممتاز بكل عدد لازم يحطونلك صور رياييل قبل العلاج وبعده

روح جرب حظك

:)


تصدق عاد انا ودي اجرب هالشعور

جرب اركب سياره كشفت بس ما جربت شعري يطير

Barrak said...

على نفسها جنت براقش


مشكوره على النصائح

ياصاحبة التعليق الاول

وبما ان الصلع كله فوائد على قولتك بدون تفلتر وبدون شامبو ومشوط وبدون قمل

بعد قرائتي كل هالمزايا
من القلب ادعيلك تتمتعين بهذه النعمه مثلي

Barrak said...

JuVeNTiNa
اشكر مشاعرك النبيله

Barrak said...

Mamloo7a Q8ia

ابي موعد زراعه عند دكتور فاهم شغله

واهم مافي الموضوع ان المصاريف عليك

يقولون ان كل بصيله على 100 دينار وانا بصراحه يبهتي عريضه يعني بعد هالزراعه اكيد الدكتور بيكون عنده بيت بالضاحيه على اربع شوارع


اشكر مشاعرك الجياشه

Barrak said...

تراب الكويت

فعلا الصلعان يتميزون بالبساطه


لان روسهم مثل البطاطه

Barrak said...

الزين

البنت المتحجبه ياوخيتي ان بغت تصك عليها الباب وتقعد تلوفح لي باجر الضحى

والبنت المتحجبه تقدر تأجر سياره كشف وتقضب درب الوفره واذا ماكو احد تقدر تحقق الامنيه اللي ابيها وشعرها يتطاير


ماكو وجه مقارنه

انا اقولك

شوفي كومدينة البنت المتحجبه تلقين دواء للشعر ومشط وركزي عالمشط وشباصات واللازي منه

اما انا ماني قايل


وتقولين ابرد لي من غير شعر

يالزين احس فيه ريحة تعيّب

اي ابرد لي

راضي بشعر وقته وحر


ادعيلي يالزين يخترعون دواء جديد او على قولت عبدالجسين جبود نمل


شكرا

Shather said...

loooooooooooool

الحاله كسيفه عند معظم رياييلنا
الظاهر جينات الكويتي فيها شي اللي يصلع بسرعه

احسن دعوه اقدمها للكويتي بهالمناسبه )الله ينبت شعرك)
:P

Anonymous said...

::::::::::::::

سبحان الله من قريت الكلمات تذكرت هذي القصيدة :
لصديقنا في رأسه صحراء
جفت فلا عشب بها أو ماء

وكأنها الميدان من بعد الوغى
فَنِيَ الجميع فما به أحياء

تزداد ما مر الزمان مساحة
وصديقنا من كبرها يستاء

ولقد سمعناه يقول و دمعه
يجري فيعمي مقلتيه بكاء

كم من دوا للشعر قد جربته يوماً فراح سدى وظل الداء

يا حسرتي ذهب الشباب وكان
لي فيه مآثر جمة غراء

أماالحسان الفاتنات فليس لي
مع صلعتي في وصلهن رجاء

قلنا له : مهلاً لمن هذاالبكاء واسمع ففي هذا الكلام عزاء

أوليس للإنسان في احرازها
شرف و يملك مثلها العلماء ؟


الخيال واسع وعندك عصف ذهني خطير

الله يعين .. :)

:::::::::::::::

Kuw_Son said...

واحد من الربع في الدوام بياخذ سيارة كشف ..
أقوله يمرك
:P

Barrak said...

charisma


شعرك ذروه شطوله


شنو معناة ذروه


مشكوره على رفع روحي المعنويه
الصيفيه والشتويه

Barrak said...

mellow

اشكرك

ولو ان مغزى الصوره واضح

بس هم اشكرك

Barrak said...

Gmashah

طابور معجبات

طابور عاد


ايه صح انا كل مااطلع من الصالون بعد ماانعم الصلعه اشوف كاميرات وتصوير


تصدقين ماادري انهم حق صلعتي

Barrak said...

lawyer

احنا لاقين ناكل عشان نزرع

تبيني احط سوريس على صماخي

لا وثوم بعد

جلاية تيفال مو براك

انتي حوليلي نص مليون على حسابي وانا اروح باريس يقولون فيه مستحضر للشعر اسمه معبوج

Barrak said...

Selezya

لاتقولين
شكرا للمؤازره

Barrak said...

Яeema

انزين ليش جذيه ليش تحريني


تصدقين

حتى ايام الشعر لما نروح البحر ونتسبح نفضة الماي من شعورنا غير

تقولين عرفج حايشه ماي



الله كريم ياريما

Barrak said...

mellow

اعتقد اللحين لو تشيكين على شاروخ خان راح تلقين شعره إنتف


بعدين عيال خان كلهم شعورهم ناعمه

الظاهر بغير اسمي لبراك خان

Barrak said...

كويــتي لايــعه كبــده

انا بهالمدونه احلم

خلوني

شيصير يعني اذا طياره ماقدرت تهبط والسبب قذلة براك


الريال اللي بالمطعم اللحين شكله شاري ام بطنين ويدورني

Barrak said...

فريج سعود

براقش جدا بريئه

وانا ابرأ

Barrak said...

kila ma6goog

شوفلي مني مناك


عطنا ممن اللي عندك

Barrak said...

shahad

يعني اللحين انتي تبين تعطيني دافع


عموما الله لايبليكم باللي صار لنا


الظاهر لازم اسوي جمعيه للصلعان

Barrak said...

5roofa

طارق العلي داش معانا بجمعية الصلعان

مابقاله شي ويصير مثلي

Barrak said...

ShLaLaT

على هالحجي تبني اعطيج عين

تبين شعرج مايتحرك

ترى انا جاهز

Barrak said...

Shather

شكرا على هذه الدعوه

والله يطول شعوركم

Barrak said...

الـــوجـــــــد

ايه هذا الحجي السنع

اللي يبرد عالقلب


اشكرك

Barrak said...

Kuw_Son

اذا ماتواطنه قوله يمرني

حياتي هدف مو عبث said...

هههههه

عجيييييب :)

SolaimaN said...

لاحد يقص عليك بالدوا والمراهم

الحل الاكيد وانا اخيّك بالدراهم

وقول ما قال سليمان؟؟

والله لا اخليك تلبس شباصه يا البرك ،،شتبي بعد ؟

:)

Barrak said...

حياتي هدف مو عبث

شكرا عالمرور وعالتعليق

Barrak said...

SolaimaN

انا بحالتي هذي مستعد احط حنه

شباصات عاد

انا راضي حتى بماشه

الدراهم من وين نجيب الدراهم
انت فاهم وانا فاهم


ان شاء الله عبيد ولدي يفوز بالجوهره وانا اول شي اسوي اخذ الفلوس واشوفلي صرفه بهالصلعه اليرعه


شباصات ها


كاااااااااااااااك

هـو111جيس said...

اخوي براك

والله أعجبني احساسك حيل

وشعورك .. حسيت فعلا فيك معاناة

فيك شعّر فيك قصيد واحمد ربك وقفت

الدعوه عند الشعر وحط شعارك فوق الصلعه

معاً نكافح الغلاء ..لا للشامبو والجل نعم للطبيعة والحياة بكل بساطه

موضوع جدا رائع .. الله يوفقك عزيزي

تحياتي

~ بـــدور ~ said...

واااااااااااو حركة هالكلمات

واحساس حلو اذا دغدغ الهوا وجهك ومو شرط خصلات شعرك ..

رووعة القصيدة

بانتظار الاروع اخوي براك

تقبل مروري لاول مرة وانشالله دائمآآآ

Super Woman said...

لووووووول ليش تعطيني عين ؟؟

لووووول اقولك جربت اركب كشف بس ما جربت افل شعري للأسف


يالله ما عليه ان شاء الله بشتريلي جزيره حقي وبشتريلي سياره كشف وبحون بجزيرتي بدون حجاب

عشان اجرب الشعور الحلو :)


تبي احجزلك جزيره مع علاج شعر ؟؟

Nescafé said...

!جذي يابراك احساس الصلعان
انزين شلون طرى على بالك موضوع السياره الكشف
hehe

بس انت لازم تحط ببالك ان العلماء اغلبهم اذا مووكلهم صلعان
;P

esTeKaNa said...

واي انا عيزت وانا اكركر
هههههههههههههه
برااااك
تذكرت واحده من صديقاتي ايام الطفولة شعرها مو ناعم كلللش
ولا فيه امل يصير ناعم
!!
كانت تقولي استكانة اذا قعدنا مع فلانه ما اقدر اركز
وما اقدر اسمعها
اقولها ليش؟
تقولي قذلتها تطيح بروحها على عيونها
وتدخل ايدها بشعرها وترفعها
وانا احتر
شعري واقف مكانه
!!
اطق رقبه
اتحرك يسار
يمين
ما يتحرك

وتدور الدنيا يا براك واشوف صديقه الطفوله ام شعر عرفيج قبل فتره
الا شعرها لا اله الا الله
ناااااااااااااااااااعم
مكتت
واشقر بعد

هذي القصه ذكرت بس عشان تعطيك امل
ماكو شي مستحيل
وذكرت على طاري كلمة هفف
لان مو كل شعر تقوله هف ويطير
في شعر لو تهف مناليوم لي باجر
ما يتحرك
:pP~



بس سؤال اشلون يشير شعرك بالسكان
انته تعطي السكان ظهرك وانته تسوق؟
هههههههههههههههههه




بس صراحة تشكر على الترجمة الفوريه باخر البوست
:))

همـ القلم ـس said...

هههههههههههه
رهييييب براك .. قصايدك جميلة وممتعه
وافضل شيئ عملته كتابتة معاني الكلمات
انا من المتابعين دوما
كلماتك تشعرني بسعاده

دمت بخير ..

mo3ath said...

لوووول
عندي موتر كشف بس خربان مايسكر تاخذه على خرابه :p

كل شي بصوب ولا الشعر يشير بالسكان

قتلتني فيها

هههههههههههه

قلب طفله said...

هههههههههههههههههه

براااك

عقب الضحك اللي ضحكته

دعيت لك من قلب عسى الله يونسك

بالعافيه و بشعر كثييف و حرير

يفرح قلبك

و بسياره كشف تحقق حلمك :)

حنيــــــن said...

براك ازيك
عجبتنى اوى الترجمه اللى تحت دى

اخبار الحر عندكم ايه
احنا هانتخنق من الرطوبه
أتمنى تكون بخير
تحياتى لك ولكل اهل الكويت الغاليين

بنت الشاميه said...

اخوي براك حدد طلبك بالظبط
تبي سيارة كشف
والا شعر ينصف صف...؟؟؟؟؟

الشعر امره هين ...بس السياره هي الجايده

الشعر مالك الا الباروكه......اشكال والوان تبيها طويله ...تبيها قصيره..على كيف كيفك...بس ولا تحتر
اما السياره فما لك الا السحب بالمجمعات او الجمعيات والحين رمضان مجبل كثر من كوبونات الجمعيه
==========
شعر تمسكه بالجف.....شايده
تصبح على كشف

Anonymous said...

صراااااحة ضحكتني من الخاطر.. والصوره اللي محطنها لشاروخ خان مسحت كل جاذبيته ^_^.. انشاء الله تستوي معجزه ويطلع لك شعر وكل حد يشوفك يقول في خاطره يالله تعطيني بس شعره من هالشعر الروعه .. اممممممم يبالك تمارس قانون الجذب

Barrak said...

هـو111جيس

وانا عجبني مرورك حيل
اشكرك استاذي العزيز

هي دعوة للتأمل في معاناة الناس المصلعين


اشكرك

Barrak said...

.. بـــدور

وجودك هو الاروع
اشكرك سيدتي الراقيه وتشرفنا

Barrak said...

ShLaLaT

ابي جزيره فيها مستحضر جديد لزراعة الشعر

Barrak said...

Nescafé

مشكوره على رفع معنوياتي

ومشكوره على هالمرور


طولتي علينا

Barrak said...

esTeKaNa

بالنسبة لموضوع صديقتك
الله يرزقنا مثل مارزقها


بالنسبة لللسكان وشلون يشير

يعن لما يصير شعري مكتكت ممكن لو التفت والا مثلا بطول على المكيف يشير بالسكان

عشون عيل

Barrak said...

همـ القلم ـس


اشكرك الشكر الجزيل


بالنسبة لمعاني الكلمات أعدك سيدتي ان يكون لكل نص ترجمه كويتية بحته


اشكر مرورك

Barrak said...

MO3ATH

هلا بمعاذ

المطلوب سياره كشف وشعر يهف هف


شكرا لمرورك

Barrak said...

قلب طفله

يازين هالدعء

عليك بالعافيه

وادعيلي بعد ربي يرزقني شعر

على الاقل بس قذله

Barrak said...

حنيــــــن

اهلا ياحنبن
أزيك

مين قال ان عن
نا حر

الجو عال العال
والثلج مش مخلينا نعرف ننام


الحمد لله على كل حال
انبسط أوي بوجودك

Barrak said...

بنت الشامية


جان زين ياوخيتي الشعر امره هين





لو هين جان ماكتبت مليونين ونص قصيده بتمني الشعر



بالنسبه للسحب في المجمعات ارجو منك مراجعة قصيدة حظوظ رديه للتأكد من حظي قبل جعوتي للاشتراك في اية سحوبات حاليه او مستقبليه

يابنت الشاميه


تصبحين على هنا

Barrak said...

بنوته


احساس الشعور بالشعر بدأ يوخز عني
وانا صار لي سنين ارمس عن مشكلتي ومحد زقرني


انا واحساس الصلع بنتحوط في عالم الاحلام الين الله يرزقني شعر

هيييييييه

الترجمه

يوخز عني يعني يبعد عني
أرمس يعني اتكلم
زقرني يعني ناداني
بنتحوط يعني بنتمشى
هييييييييييه يعني إييييه

BaNgBaNg2 said...

عجيييييييييب
والله مت من الضحك
وسعت صدورنا
وااااي
بس تبي الصج الله يعينك مشكلة
ليش ما تسوي زراعه
معنه هذا الشي ما يعيب الريال
يعطيك الف عافية

بنت الشاميه said...

اخوي براك

انت بس تعال باريس ......وكل شيئ يصير

حتى اذا تبى بسايل تعجفهم....يسونلك بسايل.....تبيها شقر.... حمره...سوده
طب وتخير........الرزاعه وما ادراك ما الزراعه

Barrak said...

BaNgBaNg2

اهلا فيك

ياوسن


اخاف ازرع اصير مثل سمير غانم

جذيه احسن

Barrak said...

بنت الشاميه

عليكم بالعافيه

شخبار جاركم اللي ماتواطنونه


سلميلي على اهل باريس

وقولي لهم اشتقنا

وبلغيهم راح ارجع لهم اذا اكتشفوا مستحضر جديد لانبات الشعر

أتيت متاخرة said...

برررررررررراك
نفس احساس ريلي بالضبط
واعليه
قلت له لا يصير خاطرك بعيد ميلادك الاربعين نسويلك زراعة

بس اليوم باخذ القصيدة وبخطها وبهديها له في يوم ميلاده تاريخ 17 -7 حتى يحس انه مو بروحه الي جذيه

تسلم أخوي براك

ذات عقل خشبيّ said...

لوووووووول

لوووووووووول

أمبي مو صج !


والله غشيت من الضحك !


ما شاء الله عليك ...

ما أدري أهو صج من القهر

ولا حس الفكاهة إللى عندك !



بس صج بدعت ...

ضحك من الصبح ...

شكله كل يوم بصبّح على مدونتك

بلا سياسة بلا هم :p



يعطيك ألف عافية ...

وإن شاء الله ما تعدّي 2009

إلا وملاقيلك علاج يخلّي شعرك مكتكت !



صبااحك خير ...

تحيّة ,,,

Barrak said...

أتيت متاخرة

بعد ماتهديله هذا النص كتبي تحت من تأليف كويتي أصلع


الله يخليه لك ويخليك له

ويبعد عنكم الالم

سعدت بوجودك سيدتي المتأخره

Barrak said...

ذات عقل خشبيّ

أهلا فيك سيدتي

اهو مو ضحك والله معاناة
وللاسف مكالبي نصفها بسيطه والنصف الاخر مستحيل

من جذيه التناقض خلق قصيده والقصيده خلقت بسمه
واحمد ربي على البسمه
وعلى الصلعه
وعلى كل حال


وحياج الله كل صبح

على طاري السياسه
مره شايب قالي

شوف يبا احنا الكويتيين 3 شغلات نبدع فيهم حتى لو مانفهم

1- السياسه
2- البورصه
3- الدين


انا مالي شغل اهو اللي قال


صباحك ورد

أتيت متاخرة said...

براااااااااااك هذاني نسختها اليوم بخط ديواني أنيق

وكتبت تحتها
تأليف
كويتي أصلع بس خفيف دم

ورايحة باجر اشتري الهدية
اشرايك اشتري له شنو؟؟؟؟
باروكه>>> أخاف يردني عند هلي
كريم شعر>>> بيقول اتطنز
بالله عليك شنو الهدية الي تناسب القصيدة ؟؟؟؟
تحياتي
ولا تتاخر علي براك بالرد
ترى بقى 3 ايام عن العيد ميلاد
شكله بيقلب غم !!!!

Barrak said...

أتيت متاخرة

اشتريله مشط

أتيت متاخرة said...

براااااااااااااااك
من صجك عاد اشتريله مشط

أخاف يطلقني!!!!!

تدري

عاد بشتريله غترة وعقال يخش الصلعة لحد ما ربك يسهل

Barrak said...

أتيت متاخرة


هههههههههههههههه


الله يشرح صدرك


مت من الضحك على اخاف يطلقني



ههههههههههههه


انا اقول بس قوليله كل عام وانت بخير وبس

قلم حبر said...

لوووووووووووووووووووووول
الحين تبي سيارة ولا شعر
!!!!!!!!!!!

Bronzeya_Na3oma said...

صح لســـــــــانك
و اجمل ما في بوستك توضيح الكلمات تحت
معنهم واضحين =))
و الله يرزقك شعر شاروخان و سياره كشف اخر موديل
ولو اني احب الريال الاصلع و افضل الاقرع بعد :\

Barrak said...

قلم حبر

ابي الستر

Barrak said...

Bronzeya_Na3oma

اشكرك على مرورك

وعلى رفع معنوياتي