Tuesday, November 6, 2007

ماي وضامي




ليش ماأحسه

وهو كل يوم جدّامي

ليش بيده الماي

وأنا جدّامه ضامي

ابفهم شالقصه

و شفيه

وشعلامي

ليش ماأحسه

وهو كل يوم جدّامي

....


فيه شي يبعدنا

فيه شي يردنا

يمكن أشواقي إنطفت

يمكن القلوب ماصفت

وماترس عينه

شوقي  وهيامي

ليش ماأحسه

وهو كل يوم جدّامي

ليش بيده الماي

وانا جدامه ضامي


12/08/2007

الأحد

56 comments:

Unknown said...

لان ما يفهم ولا يقدر
ان اللى يحب ما يبخل

الزين said...

ليش بيده الماي
وانا جدامه ضامي

براك

تهقا الحب يتغير شكله مع الوقت ومسئوليات الحياة؟؟

يصير طعمه غير؟؟

يفقد تألقه وبريقه

حتى دفاه يصير مصطنع

ومرهون بدقمه نرعصها عشان ندخل بالمود

اذا كا الحب هالشكل

على الدنيا السلام يا براك

فتى الجبل said...

أكيد بالك مشغول بواحد ثاني

Mohammad Al-Yousifi said...

الحياة و المشاعر مد و جزر

انطر المد

lawyer said...

موهذي الشربه الي تبيها و لا هذي المايه و قلبك متورس


يمكن تحتري الماي هذا يغسل القلب

بعدين تشربه؟؟

لما العين تدمع و من كثر البكي تنشف الجسم كله

وقته بحاحه الى ماي يرووووي عطش كل قطعه بالجسم



مرات الماي ما ايي في وقته

Barrak said...

Mishari

سيدي صاحب التعليق الأول

يفهم ويقدر
بس انا ماأدري شعلامي


تسلم يادكتور

Barrak said...

ZoZOta

الحب عمره مايتغير
والمسئوليات تزيد الحب
واذا الحياة او العشره صار فيها مشاعر مصطنعه يعتبر الحب انتهى

كل اللي بقوله ان هذا الموقف لم يحصل لي شخصيا ولكن احساس احسسته في عيون كثير من المتزوجين

Barrak said...

فتى الجبل

مااعتقد

Barrak said...

kila ma6goog

واذا صار الهوا خواهر شسوي

Barrak said...

lawyer

هالمره تعليقك غير
فلسفتك غير

فيه جمله قلتيها بصراحه تهتز لها الابدان

مرات الماي ما ايي في وقته

انصحك نصيحة اخو ان تبدأي من الان بكتابة الشعر
لان هالجمله مو اي شخص يكتبها

انتي شنو

ياقلبي ابتسم said...

هلا والله براك

كلمات خطيره والله

جبتها عالجرح


بس جد ابداع

مشكوور


بيبوشي

charisma said...

سبحان الله بالقلوب يا براك

يا مقلب القلوب
القلب ما يثبت على حال
مد وجزر

على نفسها جنت براقش said...
This comment has been removed by the author.
Barrak said...

ياقلبي ابتسم

هلا فيك اختي

اشكرك

شنو يعني
بيبوشي؟

Barrak said...

charisma

ماادري شقول

تصدقين

والا تدرين شلون
بس بقول مشكوره

Barrak said...

على نفسها جنت براقش

مو انا اللي ابي الماي

انا الماي جدامي
مرتوي منه
بس ودي كل شخص يحب بعد مرور مده من الزمن يسأل نفسه شاللي تغير
فيه شي باللي يحبه ماينحس
بصراحه ترددت وايد قبل لا انشر هالقصيده ان جاز التعبير لان الردود راح تكون صعبه علي

DanDash said...

....
مااقدر اقول شي

ezain_kilah said...

يمكن ياخوي كل شي جايز

Barrak said...

DanDash

ولا أنا

على نفسها جنت براقش said...
This comment has been removed by the author.
Barrak said...

ezain_kilah

كل شي جايز
بس مثل مافي ماي فيه ضامي

Barrak said...

على نفسها جنت براقش

موضوع الخيانه موضوع عظيم اذا اريد ان اناقشه سأحتاج لبوستات

مو قلتلج صعب علي اني اعلق
هذا اللي قدرت عليه

على نفسها جنت براقش said...
This comment has been removed by the author.
فريج سعود said...

ساعات الواحد من العطش يشرب اي ماي حتى لو كان صليبي

kuwaitya_7saweya said...

ليش ماتحسه وليش انته ضامي
لانه كل يوم جدامك

Aldenya said...

...........
........
.....
...
..
.


كنت راده رد ثاني غير هذا
لكن للأسف
صارت الصفحة ريفريش
وراح ردي وتعليقي لبوستك
عموما
الحمدلله إنك مو أنت اللى عايش عالإحساس
بالواقع
لأن برايي
اصعب شيء
هو إنك محاط بالحب والعشق والود
و تلقى نفسك خامل
شرارة الحب
شوي منطفية
أو نقول هادية
وتحس انك ضامي على الرغم إنك تحت المطر بايت
والمشكلة الكبرى
المطر
لي درى إنه على الرغم من غزارة هطوله
يشوفك تحس نفسك ضامي
صدقني
يجف

Najmah said...

ليش بيده الماي
وانا جدامه ضامي

مادري شسوت فيني هالجملة

SHAHAD said...

ذكرتني باغنية
بين إيديه وأحس إنك بعيد
.
.
يمكن ماترس عينه
شوقي وعطفي وهيامي

وقفت هني واايد
نعطي ونعطي بس ما يترس عينهم شي !!

دايما مبدع

qesat_5ayal said...

الحب بين فترة وفترة لازم ننضفه
وإلا يندفن وبعد فترة يموت

Shather said...

يمكن الحب يحسسك انك دايما ظميان و تبي ترتوي اكثر ؟؟

Q80 Blogger said...

تصلح على صوت نوال
جميله جدا
تحياتي

Barrak said...

على نفسها جنت براقش

شكرا على الإفاده

Barrak said...

فريج سعود


انت صح

بس هالايام الصليبي مانشوفه الا مرتين بالشهر

Barrak said...

kuwaitya_7saweya

اذا هذا سؤال ماراح اجاوب

واذا استنتاج
هم ماراح اجاوب

Barrak said...

Aldenya

اعرف هالحركه وايد تصير وياي

مايخالف مالله كتب
يكفي وجودك سيدتي

بس بصراحه تعليقك هالمرخ غير
يروي وينشّف

Barrak said...

Najmah


حتى انا

Barrak said...

SHAHAD


نعطيهم اشواقنا ماي عيوننا

ولانكون بالعين شي

احساس احس انه قاتل

Barrak said...

qesat_5ayal

صح كلامك

لازم ننقيه من الشوائب

Barrak said...

Shather

يمكن

Barrak said...

Q8i_Blogger

تشرفت بمرورك الاول

اهلا فيك اخوي

اعتقد تصلح حق
هند

بنت الشاميه said...

يمكن بخيل

البخل مو بس بالمال ....حتى بالعواطف والاحاسيس....وهذا اقسى عقاب
للمحب ذو المشاعر الرقيقه
لهم الله العاشقين ومش طايلين
****
متى بتنزل بيتك اليديد..؟؟؟؟
زهبنا النزاله وين نوديها ..؟؟؟
لوووول

Barrak said...

بنت الشامية

يمكن

وبخل المشاعر والاحاسيس جدا مؤلم واثاره بعيدة المدى

بالنسبة لبيتي اليديد
بصراحه الملاحظات اللي سمعتها وايد اثرت بنظرتي للسايت
والكسل عامل مهم اثر في نزولي لبيتي اليديد
وكل تأخيره فيها خيره

Kuw_Son said...

يمكن ما ترست عينه .. انت جاوبت نفسك بنفسك و حطيت أكثر من سبب :)

صح لسانك :)

Barrak said...

Kuw_Son

انت طحت علي

بـابـل said...

آآآآآآآه يابراك فززت الجروح وانا ماصدقت إنها تغمض ثوانى

قصيدة واايد حلوة وتعزف عالوتر الحساس


تسلم ويسلم احساسك المبرمج بالحب

وبس


بابل

nadeyah said...

صعب السؤال

ذكرت اغنيه عبدالكريم عبدالقادر

(ضماى)



----------------------------
الله يحفظك ويحفظ اسرتك

qesat_5ayal said...

كتبت ننضفه

وكنت أقصد ننفضه
نهزه
ننعشه

لان الاولى لو انها تفهم كما تفهم لكانت بدلية كبيرة لأن النظافة بالظاد
:/

kuwaitya_7saweya said...

استنتاج
وهم لاتجاوب

Barrak said...

بـابـل

حسيت بالآه مالتك أعرفها هذي الآه

حبيبي بابل
فيه امور نشوفها بحياتنا وتبقى بالقلب مهما عشنا تبقى محفوره بس منتظره حرفين وتهب من جديد

اشكرك على كلامك الرقيق

Barrak said...

nadeyah

انا تذكرت اغنية صعب السؤال
اشكرك سيدتي الراقيه على دعائك الصادق

Barrak said...

قصة خيال

هم اذا نفضناه راح ننقيه من الشوائب

Barrak said...

kuwaitya_7saweya

ادري

فراوله said...

مساالورد والجوري
مساالابداعات الضاميه
مبدعنا العزيز
الكثيرين هم ممن تغنوا وترنموا بمشاعر الحب...واحاسيس الحب..واغاني الحب
ولكن
عندما نستشعر انهارك المتدفقه يصعب علينا البوح بأي شي
لانك غير
لديك أسلوب بالتعامل مع كل نوع من أنواع شعرك
....
اكره شعور الضما..ولكن مع الحب يصبح الضما له طعم خاص
مثل المد والجزر
مثل البرد والحر
مثل البحر والبر
بس بالنهايه يلتقون عند نقطه وحده وهي
الشعور ايا كان
دمت بدفء وعذوبه
ابدا
وبدون ضما
:)

Barrak said...

فراوله

فراوله باختصار كلامك يرد الروح

دائما مبدعه في
ردودك
في
وجودك
في تحليلك

انت رائعه

qesat_5ayal said...

انت صح

Barrak said...

qesat_5ayal

شكرا