ليمن ذكرت فرقاك

ترتعش الروح

والحنايا تخاف

ليمن ذكرت فرقاك

تكتمل بملامح حزني

كل الأوصاف

وأتحرّاك

وكل ماأنتظر جيتك

وكل ماأتفزز لشوفتك

ماألقاك

وترتعش الروح

والحنايا تخاف

ليمن ذكرت فرقاك

........

الصبر وينك ياصبر وينك

ضعت أنا من بعد عينك

ولاقادر أتحمل ضياعي

ولاقادر آداري أوجاعي

ولاقادر أنساك

ترتعش الروح

والحنايا تخاف

ليمن ذكرت فرقاك

......

وتنكسر روحي برياح غيابك

وبجروحي حاسب حسابك

وداري انك سبب مافيني

وداري انك ساكن بعيني

وماخذ القلب معاك

وترتعش الروح

والحنايا تخاف

ليمن ذكرت فرقاك

براك

شيم

ودي أتكلم عن الواقع الأليم

بس باسكت لان هالشهر كريم

أشوف طبخات سياسيّه

ولويه وأذيّه

اخاف اقول

وادش بسين وجيم

.......

صندوق تنميه مافرحت فيه

ماادري ليش وايد أحاتيه

اسمع تصريحات

وفرد عضلات

بين هامور وزبيديّه

وشيم

....

ماودي بهالشهر أتكلّم

بحاول إني أتعلّم

وافرض قانون السكوت

وأطيحله محلبيه وبسكوت

وأستمر بالريجيم

.......

فيني حجي وايد .. وايد

بس رمضان يهوّن الجايد

ويخلّي الأرواح تتصافى

مالي شغل الا بالكنافه

الله يهدي الجذاب

ويعقّل اللئيم

20-8-2010

الجمعة

الشيم :من الاسماك المحببه عند اهل الكويت ، وتعد من اسماك الدرجة الاولى ، وقالوا في الامثال : الشيم أكل الحشيم او ماياكلها الا الحشيم

التحدّي

من يقبل التحدي

ويراهنّي

على قصص المسلسلات 

اللي مواضيعها

من سنة يدّي

من يقبل التحدّي

....

اراهن .. بنشوف بجي ونواح

اراهن ... على الصراخ والصياح

والخيانات الزوجيه والتفاهات

وثقل الدم بكل القطّات

وغير هالحجي ماعندي

من يقبل التحدّي

........

من يتحدّاني على تعابير الممثلين

عاقدين النونه وكلّه معصبين

ترى بيخسر اللي بيراهنّي

ياناس اخذوها منّي

صار الفن

سمك .. لبن .. تمر هندي

من يقبل التحدّي

أحاسيس حيّه

للحين الأحاسيس حيّه؟؟

للحين فيها خير الدنيا ؟؟

كثيرة أسإلتي

مالقيت حل لمشكلتي

غير اقدم حروفي هديّه

وأترجم اللي بصدري

من هواجيس

وأحلام

وأماني

كل اللي إبيه

أكون موجود

بسطر

بنبض حرف

بصدر صفحة

آنا إنسان عباره عن

كلمه ...... وأمنيّه

للحين الأحاسيس حيّه

......

وايد أسأل نفسي

ليمتى أكتب ؟؟

وأقرر خلاص كافي

بسّي

شالفايده من كلامي

وايد أسأل نفسي

علامي؟؟؟

كل ماأنوي اكتفي

أسمع صوت وفي

يحرّك المشاعر

: يقول

مثل مالجوع كافر

هم الصمت كافر

وايد أسأل نفسي

على أي أساس

سمّوني شاعر

وأنا غايتي

اقول اللي فيني

وأترجم صور بعيني

تسكن فيها يوميّه

للحين الأحاسيس حيّه

......

من فيض احاسيسي المتناثره

حتى الورق كسرت خاطره

يشوفني مرات

بدور البطل

بدور الطفل

بدور الولهان

بدور المواطن الإنسان

من فيض أحاسيسي المتناثره

حتى الورق كسرت خاطره

: قالّي

كمّل ... وقول

يمكن بحروفك تنول

دنيا جديده

رسمتها بخيالك

خذ الحروف حلالك

لاتفكر بإعجاب

او قبول

أو عطيّه

للحين الأحاسيس حيّه

....

شاللي قاعد اقوله

تعديت منطق الجنون وأصوله

غمضت عيني

وظل الحبر ينزف

وخلاني احلف

اني ابقى

صورة مالها برواز

نظرة يتيم معتاز

غمّضت عيني

وحلمت بوفا

مالقيت غير حروفي

الوفيّه

للحين الأحاسيس حيّه

٨-٨-٢٠١٠

الأحد

إنت الأمان

إنت الأمان

اللي .. أرتجيه

إنت المكان

اللي تمنيت .. ألاقيه

ولقيته بعيونك

يامنبع الطيبه

والحنان

إنت الأمان

...

إنت إحساس ....ماينوصف

أبي أوصفه .. ماأعرِف

إحساس يطمّن ... ويِسرْ

فيه من العذوبة.. والسّحر

وفيه من المعاني

ألوان

إنت الأمان

...

مالي غير حضنك ... حضِن

ماألقى مثلك ..... ماأظِن

وليش ألقى .. ياكل المنى

إنت .. لحظات الهنا

اللي أتريّاها

من زمان

إنت الأمان

٩-٣-٢٠١٠

الثلاثاء

ألمان

تدرون شكثر بينا وبين الالمان؟؟

انا أجزم.. مليون سنه ضوئيـه

ماتلقى واحد مكسور ..وتعبان

لاشايب لاصبي ..لاعيوز لابنيه

ودي القى واحد ..فيهم عيزان

والا واحد ضايقه فيه ..الدنيا

من غيرهم يعرف قيمة ..الانسان

من غيرهم يقتل معنى .الإتكاليه

تلقى الرسام العالم الفاهم الفنان

واللي يلاحظ نبته ويراقب صمّيه

حتى راعي المطعم متعلم وفهمان

مالقيت عندهم حراميه وجمبازيه

ناس سطّروا للعلم قيمه وعنوان

ناس ماشين صح وفعلا شقرديه

تدرون شكثر بيننا وبين الالمان

اذا مليون سنه صدقوني شويه

ضاق الصدر

ضاق الصدر

والوله

 كسرني كسر

ضاق الصدر

وشلل فيني شراع الوله

 وغرب بسمتي

و بوسط يوفي

الام ولسعات جمر

ضاق الصدر

...

حبيبي

انجبرت ابتعد عنك

فقدت ضحكة سنك

وفقدت الطيبه

وتعّبني الصبر

ضاق الصدر

......

يضيق الكون بغيابك

قلبي تركته عند بابك

ماتعلم يدق الا باحضانك

ياللي الامان عنوانك

شوفتك تِسر

ضاق الصدر