اوتار طائفيّه

الموضه العزف عالاوتار الطائفية

الكلام سئ واللحن قام ينشّز

لاتهنينا بلحن لاتهنينا بأغنيه

الكل بالمعاياة والنشاز متحفز

تدرون شمعناة وحده وطنيه

يعني التفاهه والفوضى ماتلفِز

احنا بنعمه والله عطانا هديه

نبي حوار هادي ماينرفز

اخذ نص الكلام اترك باجيّه

ليمتى الواحد يلمّح وينقّز

نبي بس ترحمونا شويّه

كافي فتن ولويه وتعنطز

ليش هذا وليش هالأذيه

ليش هالافلام وهالتجمبز

الطائفيه تحتاج وقفه رجوليه

مايصير الكل ساكت ومتنعّز

صار العزف عالاوتار الطائفيه

ترى هاللحن والله بدا ينشّز

ياحكومه تكفين

اذا كنت مواطن يحترم الانظمه والقوانين

مااحب السياسه مااشارك  باعتصامات

مااقول هذا بواق هذا حرامي لعين

ماتحجى عن وزراء ونواب ونائبات

شنو جزاتي ياحكومه قولي تكفين

قولي قبل لاأستخف قوليلي زتات

انا مواطن صالح ماأسولف بدواوين

ماأصفط غلط ماأطوف حتى الاشارات

ماأعرّض نفسي لمساءله وجيم وسين

ماأشوف أخبار مااتابع مسلسلات

ترى انا مواطن انطع من الدارسين

منهنه غير شكل حتى أقط قطّات

ياحكومه شتبين اصير .. شتبين؟

ماقلت ابي اراضي عقارات وسيارات

لازم تعطين كادر للراكدين للمخلصين

اللي يمشون يم الساس بهدوء وسكات

لاتشعل النار

لاتشعل النّار ..  حاول انك تطفّيها

الجسد..... مايتحمّل حروقٍ كثيره

هدّي النفوس... والعقول حاول توعّيها

إزرع بالناس حب.. وألفه ..وغِيره

 على أرض مالنا عيشه إلا فيها

وحب يدلّي اللي ماعندهم بصيره

باجي للعين أمل تشوف ....لاتعميها

خل النور يداوي قلوبٍ  وكسيره

الكل ملزوم عليه هالأرض يداريها

يحطها بعينه ..ويصحَى ضميره

الفتنه موجوده ..لانحاول ننفيها

ترى هالكلمه  ..كئيبه..كبيره

النار إذا إشتعلت مانقدر نحتويها

طول عمرها النار جبّاره وخطيره

كل واحد  شغله وحده بس يسوّيها

لازم يحط بين عيونه هالديره

١٨-١١-٢٠١١

الجمعه

يرفرف علمنا

مو منّا ياديرتي

 مو منّا

إحنا نبيلج الخير

فيه ناس

ودها تفرّقنا

مو منّا ياديرتي

 مو منّا

....

إحنا عيالج

إنتنشّق ريحة يالج

وعبير سِيفج

إحنا بوقت الشدايد

سَيفِج

إنتي عيونّا

إنتي روحنا

إنتي دانتنا

مو منّا ياديرتي

 مو منّا

......

يالغاليه تحمّلينا

 مو بيدينّا

الويوه تغيّرَت

والصدور ضاجت

والأرواح الوفيّه

مالقت

 اللي تتمنّى

مو منّا ياديرتي

 مو منّا

......

بيتغيّر الحال ... نوعدج

يالحبَيْبَه .. يالدّانه .نعاهدِج

خيرج اللي شفناه ماننساه

رغم الألم والغصّه والآه

يبقى بقلوبنا

يرفرِف عَلمْنا

مو منّا ياديرتي

 مو منّا

.....

الحلول بنلقاها أكيد

 الدّوني ماراح يستفيد

ولانرضى بسمتِج تروح

إنتي الكيان و الروح

إنتي النبض

اللّي ساكنّا

مو منّا ياديرتي

والله مو منّا

......

ياديره عيالها إقهرَوا الغزو

مالهم مكان بيناتنا اللّفو

باجر أحلى صدقوني

ياهلي سمعوني

دايم عالي

بيرقنا

مو منّا ياديرتي

والله مو منّا

.....

قلبي عليج يالعزيزه عوّرني

كل يوم خبر كئيب يذبحني

كل يوم خنير باليوف يطعنّي

ياكويت دمعتي على خدّي

غير الله سبحانه ماعندي

يارب آمنّا بوطنّا

يارب آمنا بوطنّا

يارب آمنا بوطنّا

يارب آمنّا بوطنا

يارب آمنّا بوطنّا

يارب آمنا بوطنّا

يارب آمنا بوطنّا

١٨-١١-٢٠١١

الجمعه

على هواك

على هواك

أنا طير بسماك

جناحه ينطوي

بنسمه منّك

ويرفرف بلقياك

على هواك

......

على نسماتِك أتنفّس

تبتدي الحنايا تِحِس

بروح تسكِنها

تِحس إنها

قطرة ندى

وذابت بحشاك

على هواك

......

وعلى هونك علَيْ

شوي ...شوي

انا مو قد هالأشواق

على هونك ياملاك

على هواك

....

بالهدا بالهدا ياعمري

يانبض الحياة بصدري

ياكِل الحُب

إرحَم هالقلب

مايتحمّلني قلبي ويّاك

على هواك

الاربعاء ٢-١١-٢٠١١

إبتِســَم

وإبتِسَم

وإبتسمت دنيتي

ورسَم

حياتي وخطوتي

ودلاّني دروبي

درى إنّه للوله

ألَم

وإبتسَم

......

رَد وأحيا خفوقي

وسرى الدّم بعروقي

و ردَّتْ روحي

ونوّرت سماي فيه

كل شي أقدر أسمّيه

إلا حسنه

ماعرفتلَه إسم

وإبتسم

......

حَس بالقلب إلتاع

أنهى موضوع الضياع

بضحكَة سِنّه

اللي من أشوفها

ماأقدر أرِد

النّسَم

وإبتِسَم

بريحَـــاتَــــه

من كثري سهر

من كثري حاتَه

من كثري

ذاق المر

بحياته

وظل ساكت

شبع قهر

شبع شماته

من كثري سهر

من كثري حاته

......

صُبرت ..ولانِلت

ياما حجيت وقلت

ومحدٍ سمعني

الزمن كسَرنِي

وسوَّه فيني

سواتَه

من كثري سهر

من كثري حاتَه

......

كنت يمّي .. وأحاتيك

كنت يمّي .. وأناديك

كنت .. وكنت .. وكنت

شاخَذْت منّك ..إنت؟

جرحت القلب

وخطّيت نهاياتَه

من كثري سهر

من كثري حاتَه

....

شاقول ؟شانطِق؟ كافي

غامض نساي ومجافي ؟

وشيفيد الصبر شيفيد؟

يوميّه جرح يديد

وقليبي بريحاتَه

من كثري سهر

من كثري حاته

٨-٤-٢٠١١

الجمعه

تغريده

ممكن  توصل السما وتِنشِهر بتغريده

و بكلمتين تصير معروف ومشهور

قَطَّه من فلان و حجوة من إيديدَه

توصل بلدان تعبر وديان وبحور

مغرد تقول عنّه الله يزيده

ومغرّد لو طروه يشع  النّور

تصير حجوه للناس بقصيده

وتكون نجم ضاوي وبدر البدور

تويتر يودّيك لأماكن يديده

بدون ترزز و تسمّت و بخور

يعرفونك  وتصير كلماتك نشيده

توصل طنجه دبي  وكوالالمبور

وتسولف عنك جانيت وتفيده

وبزّه وحسينوه وخلّود ونصّور

غربلونا كل يوم تقنيه جديده

تاخذنا تدبّخنا  تلف فينا تدور

التغريده أقوى من مقالة بجريده

التغريده  تعدّل وتسنّع الأمور

خل نختصر حب الكويت  بتغريده

 اللي يحبها بس يكون مشهور

ثقافة الإنصات

 أعظم الأمور ..تنحل بهدوء وبسْكَات

بدون صراخ .. وإصْوِتَه....ونِجرَه

بإيدينا تصير جميله جدا الحيــــاة

وبإيدينا نزرع .. الفتنه ..والمضرّه

 عندنا بدل المليون مليـــــــــــــــارات

والعموم معصّب .. وعايــــش بحسره

اللي أشوفه مجرّد حركــــــــــــــــات

أفلام محبوكة السيناريو والفكره

مايصير إعتصامات  وخزعبلات

و ننسى نحِب وإنتعلّم بس نِكرَه

فيه شي إسمه ثقافة حِوار وإنصـــــــات

لو فهمناه نشيخ على العالـــــــــم بكُبرَه

لو كل واحد حب الكويت وسكات

جان طفنا السويد وإنجــــــــلترا

عكوس

إلى الاخوه والاخوات اهديكم ديواني الشعري الثاني

تجدونه على هذا الرابط

http://itunes.apple.com/kw/app/3koos/id446759166?mt=8

وشحيلة الملهوف ؟؟

وشحيلة الملهوف

اللي عمره راح منه

وهو يشوف

وشحيلة الملهوف

......

وشحيلة هالعين

غير انها تشوفك

وشحيلة الشوق

إذا ماحرّك جتوفك

وحسيت الكون كله ..وله

و بس صوتك اعتلى

يانبضة اليوف

وشحيلة الملهوف

.....

كل اللي احس فيه

لهفه تعوّر القلب .. وتشقيه

حرّة طفل يناغي

وجمال طاغي

وقلب مخطوف

وشحيلة الملهوف

.....

الملهوف اللي تعَب

تعب ... وهَم حَبْ

والوله زوّد حروفه

كِتب إسمك بشوفه

وماغير إسمك يشوف

وشحيلة الملهوف؟؟

٢٣-٧-٢٠١١

كل شي عندي

كل شي عندي

إنت اللي ناقصني

عايش علي حسّك

اهو اللي معيّشني

مخلّيني ألمسك

واسمعك تكلّمني

كل شي عندي

إنت اللي ناقصني

.......

شنو يعني هالوجود

لو ماألقالك وجود

ولا ألمحك بطرف عيني

تدري شيصير فيني

تذبَحني

كل شي عندي

انت اللي ناقصني

....

ولهان عليك .. ياريحة هَلي

ياللي على الصدر معتلي

وفارد جناحك ومحتويني

ياللي مريّحني ومعنّيني

لا مو معنّيني... مريّحني

كل شي عندي

إنت اللي ناقصني

......

الخميس

١٤-٧-٢٠١١

دوسلدورف

هناك

ترى النهار إتغيّر ألوانه بليّاك

ماتدري قلبي شيصير فيه

تغيّر كل شي وللحين أتحرّاك

وللحين موعد رجوعك أحتريه

للحين الكف منتظر مَدّة يمناك

للحين عندي أمل موعدك بتييِه

باشوفك أكيد..... وأكيد بالقاك

للحين عندي أمل ... إيه إيه

أنساك!بالله  شلون أنساك

قلبي شاللي بس  ينسّيه؟

اللي بقوله ترى تعبت بلياك

سمّه ينون سمّه  اللي تسمّيه

والله النهار اتّغير الوانه بليّاك

والنور يفقد بعدك كل معانيه

٣-٧-٢٠١١

الاحد

روتردام

قصة هواي

ياليت اوصف قصة  هواي

وأبيّن شكثر أهواه وأحبّه

عرفته وتغيّرت علي دنياي

رد روح من الأحزان منّهبَه

تلونت بألوانه وصار سماي

ارتحت وانا اللي حياتي صعبه

خلاني للحزن دالهٍ نسّاي

ودنا الفرح صوبي وإنا بقربه

ابوصف إحساسي بس مايحتاي

مهما قال قلبي عنّه أحسه غَبّه

ياليت أوصف قصّة هواي

وابين شكثر قلبي يحبّه

٣١-٥-٢٠١١

الثلاثاء

عيون بالتعب متكحله

ودّي

 برحله

ودي الحياة

تصير سهله

ودّي احطم قيد مسئوليّاتي

ودّي أغيّر معالم حياتي

وابتعد عن هالكون

كلّه

ودي  برحله

......

ودّي بمكان

يفهّمني معنى النسيان

ودّي بمكان

يغيّبني عن دنيتي

ودّي  بمكان

أجمل .. وأحسن

وأحلى

ودّي  برحله

....

رحله مشاويرها جميله

ماتعرف التعب أبد

راضي لو كانت طويله

وراضي لو ماتردنِي بعَد

ترى العين بالتعب

متكحله

يالله ياقلبي

خذني وياك برحله

١٩-١-٢٠١١

الاربعاء

منظره

فيه ناس

لازم يشوفون المنظره

يشوفون اللي يصير

مفخره؟؟

وإلا مسخره؟؟

فيه ناس لازم

يشوفون المنظَره

.....

قعدَه مع النفس يمكن تصحّيهم

يمكن يعرفون شاللي عاميهُم

وعنادهم بس وين مودّيهم

لايقلبون الديره

مقبره

فيه ناس لازم

يشوفون المنظره

.......

شوفوا روحكم وإنتو تصارخون

لاحظوا الأفلام تطمشّوا عالينون

مودّينا وين ؟؟ ووين بتروحون؟؟

ترى تمشي الحياة

بالتسامح والمغفره

فيه ناس لازم يشوفون

المنظره

.....

يمكن ماكوا حد نبّههُم

يمكن مافي حَد فهّمهُم

ترى مستمرّه لعبتهم

ومافيها غشمرَه

ضروري يشوفون المنظره

٣٠-٥-٢٠١١

الاثنين