من خبر بجريدة تنقلب الدنيا وتنعفس
ومن سالفه بدوانيه يصير استجواب
اذا هذوله ربعنا طبيعي الحال منتكس
وطبيعي احنا للتخلف مشرعين الباب
اللي يقط بدليه احتمال كبير ينجِبِس
واللي يغني إغنية يسووّنه كباب
الروح من الكدر والضيم قامت تنتِرِس
نسينا الفرحه والبهجه وحتى اليبّاب
مفهوم الانهزاميه يوميّه فينا ينغرِس
شيّبونا غصب وإحنا للحينّا شباب
فيه ناس عقولهم جنها قوطي منخفِس
يسرحون يمرحون من غير أي حساب
احس نور الأمل خافت خايف مندِعِس
بقلب جم واحد يحب بذمّه هالتراب
تراب غالي يبيله ناس شوي تِحِس
تكشف المخادع وتبخص اللئيم والكذّاب
٢٧-٩-٢٠١٠
الثلاثاء
تنعفس : تنقلب رأسا على عقب
منتكس : منقلب
ينجبس : أي ينكبس أي يضرب
تنترس : تمتلئ
اليبّاب : الزغروطه قوللولولولوووش
قوطي : علبه والجمع قواطي
منخفس : يعني قوطي سفن اب ودايسه عليه سياره
مندعس : مختبئ
تبخص : تعرف ... تفهم
4 comments:
صح لسانك
بس هذا قوطي سفن أب صجي ؟؟
يعود لأي عصر ؟؟
لو أطحس ما أشرب منه
شكله حصاله على فكره
SHOOSH
صح بدنج شكرا
هذا قوطي سفن اب على ايام رونالد ريغن
صح لسانك خوش حجي :P
كركور
صح بدنك اشكرك
Post a Comment