Sunday, June 14, 2009

تفاكير





تفاكير

تحوم حولي

مالقيت لها حل

ولاكوّنت لها مصير

تفاكير

،،،،،،،


أناقش أحوالي بتكوينها

أصفن مع تلاوينها

ماألقى لون يشبهني

ألقاها تمِـلني

ومع نسمات الهوى

تطيــر

تفاكير

،،،،،،


ماألقى فكره قبل ماأنام

كل شي أفكّر فيه جدام

وأنسى أحضن لحظه وحده

أآنس فيها هالوحده

بس عمره اللي ببالي

مايصـير

تفاكير

،،،،،،


ماأخلي عيال ولاديره ولاإنسان

يطري علي كل حي بهالزمان

وألقى حلول لمآسي الأيام

وأصنع آمال وأنثـِر أحلام

وقلبي ينجرح بضمــير

تفاكير

،،،،،،،


ياخذني الجنون أكثر من العقل

وأغيب عن دنياي وشوفي يقِـل

وتبقى الأفكار تناديني

وأبني من جديد تكويني

وأرجع كِـسِـير

بتفاكير

تحوم حولي

مالقيت لها حل

ولاكوّنت لها مصير

15-6-2009

الأثنين

19 comments:

esTeKaNa said...

إييييه يا براك
هذا اهو الليل وتفاكيره
فكرة تتمخطر
وفكره تتشرقد
وفكره تدز فكره
!!
ويروح الليل واحنا بتفاكير
:(
توقيت ممتاز
وبوست جميل كالعادة

SHAHAD said...

هالتفااكير تاخذنا وتوديناا
مبدع وصفك : )

فريج سعود said...

طنش يلعن ابو الفقر

chــاي أخضر said...

دام انك ترجمتها وأطلقت وصفها

يعني انها مجرد تفاكير
!

عفره said...

الله عليك
روعه تفاااكير

Purplecious said...

كثرة التفكير تؤدي الى الصلع

ليش مو حاط صورة واحد مصلع!!!؟

Barrak said...

استكانه


سيدتي صاحبة التعليق الأول

عاد الافكار المتشرقده وايده

اشكرك على كلامك

وبوستك اجمل

Barrak said...

SHAHAD

تاخذنا وتجدينا وتودينا ومرات تنهينا


اشكرك سيدتي

عليج غيابات وايده

Barrak said...

فريج سعود

يمكن لما أستخف راح أطنش


ترى مابقى شي

Barrak said...

شاي أخضر

انا حاولت إني أترجمها
أعتقد اني ماوفيتها حقها

Barrak said...

عفره


اشكرك ياعفره


تسلمين

Barrak said...

Purplecious

انتي تكلمتي عن التفكير

انا تكلمت عن التفاكير

التفاكير ماتسبب الصلع

تسبب الخرف المبكر بعيد الشر عنج وعني

ميمة السبيت said...

panadol night طقلك حبة

و صدقني احلى نومه

Barrak said...

ميمة السبيت

انا بيني وبين البنادول بأنواعه حربا ضروس


الظاهر يبيلي سفره معتبره

انا محتاج اشوف امور وايده تمشي صح

اعتقد مالي الا باريس وضواحيها

للوش said...

فكرت و فكرت .. وأيقنت .. و أستجمعت قوى قلمٍ ..

يستمد .. غذآءهـ .. من شرآيين و أوردهـ

تحمل بـ دآخلهـآ .. .. حرفـآ أحمرآ ..

فـ فكرت و أيقنت ..


ثم أعلنت أن أبقى .. هنــآ ... صمت

يوردني للصمت ... سكونـآ ..

ويغرقني الفكُر .. تأويلآ ..

Barrak

أبقيت دفترآ .. أبيضـآ ... فـ تحدث الصمتُ ..

بـ قنـآديل .. شموعٍ ... تستبيحُ الإحسآس رغمـآ ..

لـ تندلق ... موآكب .. الدموع ... من خلف كوآليس المحبرة ..

أعلنت إسدآل الستـآر ... و ... بقي صدى أصوآت الحرف ..

هنــآ .. أنت

رآئعٌ و .. أكثر

دآم عطـآء فكر .. يجيد رسم الحرف .. لـ يستقر في الفؤآد

ودمت بـ نقـآء

GUCCI-q8 said...

تفاكير
ارسمها بصوتي
ألونها من لوني
سمار الشمس بلوني
وريحة الموج عطري
والقاك مثلي
تغرد تطير لبعيد
تبي شوية حنان
تبي تصيح وتقول
للطير
للبشر
للوحوش
ذا انا
تفاكير

وايد حلوه تسلم

Barrak said...

للوش


في كل مره سيدتي اقف محتارا

مااذا افعل

وماذا اقول


هل اقول شكرا

أم أقول كلامك كبير علي


الله يحفظك

Barrak said...

GUCCI-q8


وريحة الموج عطري

ياسلام عليج

تراب الكويت said...

"
وأنسى أحضن لحظه وحده

"
كم اكره هذا الموقف
يضيع جمال اللحظه في حسابات الغد
ويضيع جمال جنونها بما يجوز ومالا يجوز

كن هنا لتنعش الاحساس دوما

:)