Saturday, March 21, 2009

أبو الكنابل


هذه صورة للحاف أزرق اللون ووساده ليست خاليه بل محتضنه توم وجيري داخل مقاعد السياره وكل هذا بسبب إبني محمد الملقب بخشيم الفارعندما رفض الذهاب للمدرسه إلا مع هذا الغطاء وتلك الوساده الحمراء
نظرت إلى حالة سيارتي العزيزه وأنهملت من مقلتاي الدموع بسبب دكتاتورية الابناء تجاه الآباء في هذا الزمان الصعب


آخر عمري أنا إقلبوا سيارتي دار
دار راعي أوتي ومترِّسَه كنابل
حرام عليكم جذيه بسيارتي صار
باجي بس تنتِرِس كواسكو وبلابل
ليش ياوليدي ليش ياخشيم الفار؟
تخلي الأبو يشوقل وينوقل ويعابل
باجي تحط ناي ومياديير وطار
مابقى إلا تحط فيها بعد قنابل
عشان أودّيكم المدرسه أعيش بنار
نار حاميه ملزوم أوقفلها وأجابل
أشوف السياره وأنا حيل محتار
هذي سيارتي وإلا حدائق بابل؟؟
إنقط كل شي فيها عفيه عالشطّار
باقي تحطون على عقالي سنابل
آخر عمري سيارتي إنقلبت دار
حرام عليكم سموني براك أبو الكنابل

5/3/2009
الخميس

معفوسه : قلبت رأسا على عقب
راعي أوتي : الذي يكوي الملابس
مترَسه : بتشديد الراء وفتح السين أي ممتلئه
كنابل : ومفردها كمبل أو كنبل أي اللحاف
كواسكو : والمفرد كاسكو وهو طير الأمازون الناطق
ينوقل ويشوقل : يشيل ويجلب ويأخذ (( ينوقل )) مفردها (نقل ) من نقل و((يشوقل )) من شوقل أي (شقل ) هذي من عندي لاتصدقون
المياديير: والمفرد ميدار وهي الحلقه التي تكون بأسفل خيط صيد الأسماك ويكون معه البلد أي الثقل ويقولون لمن يخيط الميدار بالثقل (البلد) يردع
أجابل : أقابل
إنقط : بتسكين النون والطاء أي رمي مثال حمادوه قطّوه بالسكه اي حمد أو أحمد رموه خارج المنزل

31 comments:

why me said...

صح لسانك


ياحلوه ولدك الله يخليه لك
:)



وبعدين ليش زعلان سيارتك صارت ستايل
;p

Mohammad Al-Yousifi said...

welcome to the kanabel club

صبا said...

الله يخليلك عيالك
ويلحفونك بأحظانهم..اذا كبرت
ومو بس انت الي سيارتك فيها كنابل

في مثل حالتك وايد

الا عبودي شخباره
ترى يمعت المهر بقت الدزه
؛)

Fahad Al Askr said...

آخر عمري أنا إقلبوا سيارتي دار

لذلك أجد نفسي محاولا الدفاع عن آخر قلاع العزوبية

مركبنا said...

الله يخليه لك

وشفيها ليصار بالسياره كنابل

ميرامار said...

صج صج ضحكني البوست

خشيم الفار طلع جبااار

:)

بنت أحمد said...

ليش ياوليدي ليش ياخشيم الفار؟
تخلي الأبو يشوقل وينوقل ويعابل

لبى قلبه حمود ربي يخليه يارب

يعني يابراك يوم كنت صغير ماكنت تعفس على أبوك ؟؟؟؟

خله يوسع صدره ويدلع عليك

ربي يخليه يارب ويجننونه عياله

Amphibious said...

لووووول
تذكر لما كنا صغار تهقى نقدر نقول محنا رايحين المدرسة الا جذي

Barrak said...

why me

صح بدنك

الله يخليك

سيارتي صارت مثل شبرة الخضره


وانتي الصاجه

Barrak said...

ma6goog

كنابل الصبيان غير

Barrak said...

صبا

الله يسلمج ويخليج

بالنسبه لعبودي

يقول انه مو مفكر بالزواج

وترى يحط جل وايد موتقولين

Barrak said...

Fahad Al Askr

والله ياخوي العزوبيه زينه شينه


بس هم احسن من الكنابل

والدكتاتوريه

Barrak said...

مركبنا

الله يسلمك

اي والله شقيها اذا صارت السياره حالها حال كراجات الشويخ

Barrak said...

ميرامار

عليك بالعافيه

اهو بس جبار


صك على معمر القذافي

Barrak said...

بنت أحمد

الله يسلمج ويخليلج احبابج

والله كنت مؤدب وكافي خيري شري

ماأذيناهم

الله يرزقه بعيال يسوون فيه مثل ماسوا بأبو الكنابل

Barrak said...

AK-47

اخاف بس


اذكر مره قلت حق ابوي الله يرحمه يبا ليش ماتعاملني بالمثل

سوه فيني حركة سنوكا بس بالعقال

SHAHAD said...

وااحلاااااته
ربي يخليييه لك ويخليك له
بعد شيسوي مسكين مشتهي يتلحف فيه بالسياارة برداان الولد : )
يازين سواالف اليهاال

Barrak said...

SHAHAD

انتو قعدوا قولوا واحلاته

وانا اتمسخر


انا حبيت اشرح معاناة جيل

اللي انا منهم

اتمنى ان خشيم الفار مايقرا كلامك

Amphibious said...

لووووووووووول

Anonymous said...

هههههههههه

اهم شئ ان حمودي مرتاح ,,
ربي يحفظه ,,
^^

قصيده ممتعه اعجبتني ,,
كل الشكر لقلمك المبدع اخي الغالي ,,
دمت بخير ,,

كويــتي لايــعه كبــده said...

الغالي يرخص علشان الاغلى

للوش said...

Barrak

الله يِحْفظًهُـ ويِخًلِيه لَكُمْـ
يِتْربَى بِعِزَكْـ وِعْز أُمُهْـ
قوآفي عذبـــ . ..لـِ ذآئقهـ آعتْدنْآ منْهآ الآجملـ دوٌمآً
سلمَ حضوٌركـ المٌميِز دآئِمآً
ودمتِ بِطٌهر
وُد.. وَ..جَنآئِن يَآسمِين

Barrak said...

AK-47

جنّي بعتها ؟؟

بـركـــــان said...

بعد التحيه

ههههههه الله يخلي هم لك ان شاء الله .. خشيم الفار ذكرتني لما الوالده تبينا نطلع اللي بخشمنا بكلنكس طبعا P:

Barrak said...

أسيرة اللوحة

اشكرك اختي العزيزه

اللحين خشيم الفار اهو اللي يرتاح وانا ابو الكنابل عادي


مايخالف


لنا الاجر


تسلمين

Barrak said...

كويــتي لايــعه كبــده

يخرب بيت الحب شو بيذل

Barrak said...

للوش

ودي اخلي خشيم الفار يقرا كلامك
عشان يفهم الذوق


بس ماكو فايده

اشكرك ايتها الرائعه

Barrak said...

بـركـــــان

ههههههه

ضحكتني


كانوا يقولون لكم سووا خشيم الفار


هههههههههه

`~MnO YeNSa! ~` said...

يا حلوه
يموووون
يمووون
مو خشيم الفار


خلاص يمون
لو يقلبها
سرداب
هم يمون
:P

'3air said...

يا حليله خشيم الفار طمااشة
حدها قوية.. مخاد و كنابل :)

وقصيدة ممتعة يا بوالكنابل :)

Barrak said...

منو ينسى

اعتقد خلال فترة وجيزه راح يقلبها سرداب

مابقى شي


الله كريم