كاره باكر

على كلمه

على خبر

ناطر

كرهت اللحظات 

كرهت اليوم 

وكاره باكر

...

انا راضي بالجليل

انا كتلة من حنين

انا عايش سنين 

مكسور الخاطر

كرهت اليوم 

وكاره باكر

....

ذبحني غياب احبابي

انولد الخوف عند  بابي

صرخت بكل كلمات الرفض

لا ...

كافي ...

 مابي ...

مابقى بالدنيا رجى

يطيّب الخاطر

كرهت اليوم 

وكاره باكر

.....

بارفع للامل رايات

والحلم بعيوني بيبات

بارسم للامل ملامح

واثبات

منو كثري 

على حلم اللقا موّات

منو كثري 

كتب بدم قلبه للوله

دفاتر

كرهت اللحظات

كرهت اليوم 

وكاره باكر

زولك ماغاب

ماغاب 

 عن عويناتي زولك .... ماغاب

منثور بنسمات الهوى

وعلى خد السحاب

انت زولك

الاهل

الفرحه

اليبّاب

 عن عويناتي زولك .... 

ماغاب


....

رغم بعادك .. ورغم ناري

تزيد الموانع .. ويزيد اصراري

شلون جرح غيابك يبرا

وانت طيف .. وذكرى

لو فكرت انساك

قلبي يهاب 

عن عويناتي زولك .... ماغاب

مشاعرك

خابرك 

من يهل الغيم

تذكر اللي كاسرك

خابرك

من تحس بالمطر

ترتروي  مشاعرك

مايغيرك 

الا ... قطرات الماي ..

 لي تغنّت وأَنشِدت

مايحركك 

الا  السما .. لي تنهّدت

ماغير الامطار 

تجبر بخاطرك

خابرك 

خابرك

عَنْوَه

كنت أبي لحظات حلوه


ويضيع عمري على شي .. يسوى

كنت اتمنى

صدر يحتويني

اتعناله

ويشيلني بيوفه

ويقدّر العنوه

كنت ابي لحظات حلوه 

.....

 من يبعد الياس .. من عمري؟؟

و يبرّد الضو اللي بصدري؟؟

كل مااحتاجه... أمل

وقلب كبير

يكون لي .. أهل

وعزوَه

كنت ابي لحظات حلوه

.....

كان ودّي بعيون .. 

القى فيها مكاني

واشوف حلمي ... على اهدابها  ..  يتبسّم

كنت ابي روح  ... هوى أفّادها .. وياي يتنسّم


ياكثر ماقلبي يتجوّه

مو هذي الهقوه 

كنت أبي لحظات حلوه

واتمنى الراحه منوه

ويضيع عمري على شي .. يسوى

زهيرية

 ياكثر مالقلب منه إستاذه

اهوه ملك الغرور وإستاذه

ياكثر ماجرح وظلم وآذى

ماخذه عناده حيل والتيه

مارحم اللي كان يحاتيه

يادنيا مابقى شي ماسويتيه

بافهم ليش بس كل هذا

لازم تمثّل

مثّل

امورك ..بتستعدل

وجامل

ومن ورا قلبك تعامل

ولمفاهيمك 

حاول تغيّر

تعدّل

تبدّل

لازم تمثّل

-----

مابين قناعاتك  .. والواقع

لازم ترتّب ...أمورك

لاتستسهل دور .. التواضع 

حاول تعيش .. دورك

تمتع بقدرات تخلّيك

ت

 تكمّل

لازم تمثّل

------

لكل عمر .. شخصيه ... وحوار

اختار بعناية ... الادوار 

حاول ادوارك .. تتقمّصها 

الحياة رواية ..خلّصها

ترى العمر مايوهّل

كمل 

ومثّل

ياكويت تذكرين

بنفس هاليوم 

كنتي تنزفين

وباسم العروبه تنادين

بنفس هاليوم 

بيّنوا عيالج الاصيلين

كانوا على قلب واحد

لاسني 

لاشيعي

لاحضري

لابدوي

كانوا كلهم كويتيين

بنفس هاليوم كنتي تنزفين

.....

الدم كان يرخص لج

ارواح راحت بس ينبض نبضج

كان كل شي رخيص ..بحقج

الا حبج

 ثمين

بنفس هاليوم

كنتي تنزفين

...

بنفس هاليوم

تشردنا

تمرمرنا

كانت نظرات الناس تذبح

كنا نبي نموت

بس مانسمع كلمة مشردين

بنفس هاليوم 

ياكويت تذكرين

....

بهاليوم

كل نفس بالتضحيه تفننت

اجمل الألحان لج تلحّنت

كان حب الكويت 

ماتستوعبه قلوب .. 

وشرايين

بنفس هاليوم ياكويت تذكرين

....

بهاليوم 

يوم فكروا يفرقونا .. تعاضدنا

يوم فكروا يكسرونا .. توحدنا

كنا نعطي مانفكر بثمن

كان الوطن فعلا وطن

احلى كلمة تنقال كلمة

صامدين

بهاليوم ياكويت تذكرين

.....

سطور سطروها الكويتيين

تبي من يقراها ويستوعبها

هالديره جميله .. ليمتى بنتعّبها

متى ياكويت على خبرنا تردين

يوم عيالج مايعرفون الا التفاؤل

ليمتى ياكويت عيالج متشائمين

نزفتي بما فيه الكفايه

مانبيج اليوم تنزفين

حلمي

البارحه

كنت ... حلمي 

من رجفة .. نبضاتي

من حس .. آهاتي

لما وعيت ومالقيتك .. يمّي

تآكدت انك

 ... حلمي 

.....

الدنيا طارت .. فيني

صرت جدام عيني

حوالينك طيور تغرّد

الكون كان مورّد

وحسيت بوردتين ذابوا ... بدمّي

تآكدت انك .. حلمي

......

ماأدري انا حلمان

والا من كثر ماني ولهان

كل اللي اذكره

كنت اشوفك

وابتسم 

وأسمّي

كنت حلمي

خبر كان

بعيونك .. رسمت احلام

و وطن للأمان

حسيت اني ضايع ودلّيت

وبالقى اللي تمنيت


وصدقت وتعشمت بكلام

نلت الجسى .. وغاب الحنان

......

هقيت بحضنك

بالقى الراحه والسكون

وللاسف منك

صار العذاب علي يمون

وصرت على الفرح ولهان

نلت الجسى .. وغاب الحنان

.....


حتى  سكوتك ..

كنت احاول .. افهمه

ومن نبرة صوتك

اكتب قصايد واصله السما

كنت بعشقك .. فنان

نلت الجسى .. وغاب الحنان

....

شرهتي على قلبي .. اللي صدّق

وصدرٍ كان بإسمك .. يشهق

ماهو ندم بس .. تحطّمت

مشكله اذا عمرك ماقصّرت

وصار حبك بخبر كان

نلت الجسى .. وغاب الحنان

نعور

بيننا وبين التطور ... سور

نخاف العلن .. نعشق المستور

بقصور التخلف .. بنينا دور

نثرنا بزواياها هذره

نحب الظلمه  .. 

ونهتف نبي النور

بيننا وبين التطور سور

....

ودنا نعطي للتقدم .. اثبات

ودنا نزيّن الكون والحياة

نتكلم عن العزيمه والهمّه

واحنا نعشق المرضيات

شلون نبني

وايادينا فيها خدور

بينا وبين التطور سور

....

نقارن احوالنا .. بدول عظمى

نبي الضياء .. ونعشق الظلمه

مانواجه بعض .. مانتصارح

نحب انتناجر..انتطارح

نكسر بعض

ونغني بيرقنا بيرق منصور

بينا وبين التطور سور

.....


عايشين عشان ..انتحلطم

عايشين عشان انتحطّم

بالتشاؤم احنا نتفنّن

نحب نحاسب وانتمنّن

واذا حاسبونا

قمنا بحسبتهم نعور

بينا وبين التطور سور

مايجوز

سيف الاحلام ارتفع وانشهر

انتهى عصر يجوز ومايجوز

الناس ماتنسى بقلوبهم قهر

محد صار بتقديرهم يفوز

التخلف خله الكل ابتهر

شبعنا من كلمة بس ..يوز

عروس الخليج محتاجه مهر

دبروا مهرها لاتصير عجوز

حريه وقيود

 مستمر بالمحبه .. وعواطفها 

وبنهايات ماودّي ...أعرفها

بالضياع تايه

ماودّي اواجه

الروح .. ونقطة ضعفها 
.....

ليش أجاوب على .. اسئلتي؟

مكتفي بعنادي وصمتي

حبي له .. ماعرف حدود

حبي له .. حريه وقيود

حبي له .. سالفه مابي اسولفها

.....

فهّمت عنادي يظل ..مستمر

أقنعت قلبي يظل .. مندمر

ورضينا برحلة المجهول

وكلمالها المسأله تطول

حالتي حاله .. ماعرفت اوصفها
...

اسرح من زود هيامي

راضي لو تلاشت احلامي

دوم اسأل : وتاليتها ؟!

 الروح هذي حالتها؟!

كل ماقالت بس ... اخالفها

يبقالك اثر

يبقالك أثر 

مرسوم  بالقلب

مو مرسوم .. إنحفر

بكل نبضه

لك حس يتكلّم

لو أتبسّم ...لو أتألّم

انت إصرار قلبي

وانت قلبي اذا استسلم

انت يأسي المستمر

وانت الفرح

وانت القهر

ويبقالك أثر 

......

راسخه تفاصيلك بشراييني

لما اضيع وأسأل ويني ؟؟

القاك عناويني

ولو أنكِره من الوجود

القاك امل بعيني

هقيتك قصه وبتنتهي

كل شي انتهى وبقيت ..

بيوفي نهر ....

 تتجدّد فيني تياراته

نهر ...

انت ضفافه ومساراته

نهر 

من شوقي إبتَهَر

ويبقالك اثر

......

الأنّه تعوّدت توالف .. عمري

والضيقه تعلّمت على .. صدري

النسم نسيت اردّه من رحت

لاروحي ردّت ... ولاإنت 

مالي غير أناجيك

ماحيلتي غير أوعّيك

شوف حالي

افهم ..

أنّات موّالي

كنت شي حلو بالنسبه لي

بس مالله كتب

بس مالله أَمَرْ

ويبقالك أثر

......

الفوضى مصدر الالهام

الفوضى مصدر الالهام

تغرس الامل 

وترسم الاحلام

الفوضى تبين لك

معنى الضعف

ومفهوم الكبرياء

وتكوين الحطام

الفوضى مصدر الالهام

..

بتسمع اصوات تنادي ..بالإصلاح

بتشوف رايات تداري ..جراح

بيرسمون لك ..الحلم الوردي

افكارهم من سنة  جدّي

خذ بالك من

تجّار الاوهام

...

التاريخ مايرحم .. تحمّل

التاريخ مايجمّل المنحل

التاريخ يذكر رجال المواقف

واللي مع الشيطان متحالف

اللي مرتوي بالإراده 

وهو ناشف

التاريخ مايجامل

ولايرحم

ويفرّق بين الظالم

والظلاّم

راحه واذيه

ازرع بروحك .. ورود نديّه

وانثر بكونك محبّه 

علم مشاعرك تكون وفيه

وصالح حظك وحبّه

 ماتصير مثل ماتبي الدنيا

لاتخلي الفرح يتغبّى 

لاتمنع نور الامل 

وخذ منه ضيّه

.....

لاتعلم قلبك على الشقى

اهو بروحه بيتعلّم

عيش اللي بقى 

وحاول  تتفهّم

ترى الحياة 

راحه

وأذيّه

.....

العمر  لحظات

كل شي بيروح

عيش صح الحياة

وخلها خضرا الروح

وعلمها عالحنيه

ذرى وحضن

من لواهيب الجفا 

ادوّر ذرى

أدوّر عين علي تحِن

ادوّر حضن

أتعثّر بأشواك الوحده

واحسها بضلوعي المنهدّه

احس بيمده

ودي لو مره وحده

روحي ماتوِن

من لواهيب الجفا

ادوّر ذرى 

ادوّر حضن

....

لا ياجفا بسّك

ماتت كل النبرات

ومابقى الا حسك

مابقى شي مامات

اصوات الفرح انخرست

دوم انّة الولهان مكتومه

 مالها صدى

يروح عمره  بالهدى

وماغير اهاته على باله

تعِن

من لواهيب الجفا

ادوّر ذرى

ادوّر حضن

......

خذني من حضن العذاب

إمسح على قلبٍ جفاك إكسرَه

ليش الحظ وياي كذّاب

تعبت كثر ماباعني وشرى

ماهقوتي بارتاح

ماأظن

من لواهيب الجفا

ادوّر ذرى

ادوّر حضن

١٨-٢-٢٠١٦

الخميس

صغار

كنتِ  الإختيار

وضي النهار

كنتِ الحلم اللي

معطيني اعتبار

فرقنا الزمن 

وصرح المحبه انهار

....

كنا نحب رغم الظروف

 وفوق الصعب نطوف

كان  الشوق جبار

كنتِ الاختيار

وضي النهار

....

صرنا من الفرحه نغار

وجدام الصراحه صرنا صغار

هدمنا بيدياتنا :

احلام جميله

وحملناها الاقدار

كنتِ الاختيار

وضي النهار

.....

فجأه .. 

الجفاف تمكن من مشاعرنا

فجأه ..

 احنا والوفى ماتوالمنا

خيبتِ ظني

هقوتي لي بعيونج دار

كنتِ اسوأ إختيار

...

ملاذ ومأساة

اطريك


ويهتز فيني الحنين ..

هزات ..

اطريك 

ويصير الوله حياة

أطريك

ماألقى من يعين..

سوى لحظات  وداع 

 وآهات ..

...

ذكراك رحلة ألم .. جاسيه

تخلي الأيام ...متواسيه

ماأفرّق بين العذاب

والبسمات ..

يصير الوله حياة ..

......

 اتحاشى كل لحظه ..تذكرني

ماالقى غير الذكرى .. تريحني

الاوجاع منك .. تعيّشني

ياإني ميّت بحبّك

ياإنّه احساسي مات

وصار للوله حياة 

....

حتى البكى ..لذّته راحت

من كثر مابكيت....

ماخبرت النفس ارتاحت

إلا اذا علَي..طريت

انت بالنسبه لي ملاذ

ومأساة ..

صار للوله حياة


٥-١-٢٠١٦
الثلاثاء

قصة امتلاك

من عرفتك

وانا قطره تلوّنت 

بهواك

 مسلّم لك عمري 

 ولك بعروق قلبي

قصة امتلاك

....

قصة

 محاورها خيال وحس

وروح انت راحتها

روح انت علمتها

توصل لحالة

الجنون

والارتباك

قصة امتلاك

....

تعلمت على ايدياتك 

مفهوم الموده

صارت الحنايا 

منك مورده

بساتين الأمل بعيوني

انهت من حياتي

مفهوم الوحده

وين ماالتفت  ،،، 

القاك

قصة امتلاك

....

تزيد الموانع ويزيد اصراري

ابقى قانع رغم ناري

 المحبه منك تعلمتها

سطورها منك حفظتها

 ماادري شلون كانت الدنيا

بليّاك

قصة امتلاك

١-١-٢٠١٦