Thursday, May 21, 2015

تباهى

تباهى


اجعل الكذب 

أسمى انواع الوجاهه

استرعي للزيف انتباهه 

اغرس على ارض الواقع

بذور الخداع

وانتظر غرسك يكبر

وابني  اطماع

واجني من مازرعته

غش

وتفاهه

وتباهى 

...

خلك متباهي على مسرح الحياة

اكتب حوارات وردد افيهات

اختار الأدوار والممثلين

واسدل الستار بكيفك

النص بين إيدك 

اجعله دراما 

اجعله فكاهه

وتباهى

Tuesday, May 19, 2015

حس كلمه يصبرني


حس كلمه .. يصبرني


شوفة مكان التقينا فيه..تطمني


ذكريات لحظه وياك مرّت.. تصبرني 

ارضى بالقليل 

لانك على القليل... معودني


.....

تعلمت... مااطمع وياك

ولااتمادى بأحلامي 

تأكدت.. اني ماالقاك 

ولاباشوفك جدامي 

لكن العشق اللي تمكن بالروح 

يحطم كل ياس.. تمكّن مني 

وحس كلمه .. يصبرني 

......

تعودت اعيش على شوية امل 

ومن الشويّه انا ابني اماني 

تعودت امنّي دمعي اللي انهمل 

واوضح له قسوة زماني

لاانا اللي اقتنعت!!

ولا هو اللي فهمني

ولاحس كلمه تصبرني




Tuesday, May 5, 2015

إسكت




في هذا الوقت ..... إسكت


شوف .. وتأثَّر ..... وإقمِت

ماتفيد إنفعالاتك

خلك على سكاتك

ماراح توّحد عالم

أهو بالأصل متشتّت

إسكت 


الكلام انتهى دوره

غيّر اشكال اعتراضك

لاتفتح باب انفعالاتك 

صون عهد الصمت 

اكسر مجاديف الغضب 

ماارتاح غير... النسّاي 

ومااشتقى الا...المتعنّت 

احسن لك اسكت 





Sunday, May 3, 2015

مافي

تبي حب ؟؟

مافي

ودّك بحضن ؟؟

مافي

تتعشم بكلمة حلوه..

 رد يطمنك

 قلب يأمنِك

او شرح وافي ؟؟

مافي

......


تبي عيون .. تقدّر مشاعرك

مافي

تبي اللي ياخذ.. بخاطرك

مافي

يموت صبرك 

وينتهي عُمرك

ومالقيت لك .. صدر دافي

ومافي

...

تحتاج عقل تثيره .. ويثيرك


تحتاج راي يحفِّز .. تفكيرك


حفلة جفاف .. تِذبِحِك


تشوف التافه ينصحِك


ودك تقول: لا


تخاف ...يفضحك


ويظل سراج الرّقي

  
طافي


ومافي

....

توافه الأمور أشغلت .. الدّيره


لغة الشارع تكتب لنا ... سيره


والتاريخ يسجّل


لحظة ضياع :

مثقف

لحظة ضياع:

عاشق

لحظة ضياع

مؤدَّب

ونبقى نردد بالخفا

يانبع الوفى الصافي

ومافي

....

نَحَلْ جسم الوطن .. ونخاف يتكسَّر

ويظل الرضيع قبل الكبير يتحسّر

ونقول باچر أحلى

وللاسف

يبقى الصح ضعيف

والغلط متعافي

ومافي

مافي