Wednesday, October 30, 2013

ثواني تِسِم



بدروبي انت مرسوم رسم
لك عيوني يا عيوني عطيه



وياك حتى الثواني  تبتسم

وياك حتى اللحظات  وفيه


انت كونت للفرحه إسم
و ابسط معنى لكلمة أمنيّه

انت مرسوم بفّادي  رسم
انت كل احلامي الورديه

العمر بليّاك ثوانيه تِسِم
انت وعينك عندي بالدنيا



بدروبي انت تنرسم رسم
وانت العين وانت العطيه

براك


Saturday, October 26, 2013

عرفت شلون ؟؟؟





تعرف شلون ؟؟

 على أمل تبات

تعرف شلون ؟؟

 تغص فيك حسرات

تعرف تشْرِقْ ؟؟

وانت تشوف حلم 

يرجف جدامك ...

مايلقاله ذخر

ومايلقاله عون

تعرف شلون ؟؟

.......

تقدّر الشقا؟؟ وتفَهَمْ ؟؟

ان قلبي مايتعلّم ..

مهما يجافونه 

يخفق مرات 

يحترق بحرّات

إذبحت روح

وبجت عيون

تعرف شلون ؟؟

...........

تحس بنيران شابّه..

وضلوعك تتفتّتْ

اهات تعدّت

حدود سما

ومدى غيمه

وقصه اليمه ..

 المآسي عليها....

 تمون...

عرفت شلون

٢٦-١٠-٢٠١٣
لندن
السبت
براك

حبيب اليوف



مابقى فيني نِفَسْ ؟ولا شي أقوله
من يوم غاب حبيب اليوف  والعمر

 القلب تعب زادت  عليه حموله
و اقفت الايام علي غصب تُمُر

كل يوم يمر يعلمني  شلون أوله
كل يوم يمر يعلمني شلون أندمُر

يطول غيابه وتروح الروح بسهوله
وطعم العيشه بلياه جاسي ومر

وياه   شفت الشوق على أصوله
و ماعمرها لواهيب الوله بتخَمُر

مابقى بالصدر نفس ولا شي بقوله
من يوم غاب   حبيب اليوف  والعمر
٢٦-١٠-٢٠١٣
 السبت
لندن
براك

Friday, October 25, 2013

زهيريه مذهّبه






لو تبي العيون خذها لك هِبَه

ياللي صورتك بخفوقي مذهّبه

شبتسوّي بقلبي ؟تِذبحه بتنهِبه


نبه قلبك عن التغلّي ياخلّي نَبْهَه

وحبي بيوفك حبيبي شوي نَبْهَه

خل أحاسيسك حبيبي منتبْهَه


انا فدوه وتروح روحي لك هِبَه

الجمعه
٢٥-١٠-٢٠١٣
لندن


حدها



رِد ترى الروح واصله حدها
مابقت الا عيون تبي تشوفك

 من رحت أيامي بس أعدها
ارتبطت حياتي بلمسة كفوفك

متى اللي اخذتها وياك تردها
روحي اللي ماتعرف الا تحوفك

صبّرها بأمل فرّحها  إسعدها
متى تحن علي وتتكرم ظروفك

متى روحي لي ياروحي تردها
متى تطمن قلبي وتبرّد يوفك

متى ترد تراها وصلت حدها
روح عايشه عشان تشوفك

٢٥-١٠-٢٠١٣
الجمعه



صِدف




صدف

اني اشوفه

ووقف

نبض يوفه

نادتني عيونه

المكسوره الحنونه

كل مافيها بالوله

إعترف

وصِدَفْ


.......



واصدفت ..ولاقاني 

بعيونه أماني

ذابت انتظار

بعيونه أماني

وحلم ماصار

بعيونه أماني

 ولهان بإختصار

بس ماقدر يقولها

ماعرف

وصدف 


براك 
لندن ٢٤-١٠-٢٠١٣ 
الخميس

Saturday, October 19, 2013

زهيريه طعنه



احس باليوف من الصبر طعنه

هذا الهوى أَمَر ولأمرَه طِعنا

لاأرتحنا ولامثل النيمه سطعنا

أظلمت الدنيا بعيوننا أظلمت

ومن أمر الهوى الروح تظلّمَت

ياما هالدنيا برّت وإظلُمَت

انا وقلبي  عاندنا وماطعنا

براك

زهيرية تفاصيلك

باجي لك عشق  باجي لك

وهلني  وانا اللي باجي لك

وابتسم لي  وكملّي جميلك


بحبّك ماأجزع ولا فكرت أتوب

حبك على قلبي  مكتوب

كيف انا اقوله توب  توب

وكلي مرسوم  بحس تفاصيلك

براك 

روح متوهمه



أنادي..وصارت كل قطعه فيني متوهمه

 نداي عمره مالقى صدى ابد لأمثالي

 أناديك ماتنسمع مني لاهمسه لاكلمه

شاسوّي بعمري والضياع راس مالي

العمر لو بغى حزنه عالناس يجسمه

اكيد بتصير أحزانه كلها  حلالي

حاولت بقلبي على الخيبات أعَلمَه

ابيه  يقدّر معنى ضياع آمالي

ابي يحس واحس اني قدرت أفَهْمه

ياقلبي تكفى  راحت ذيج الليالي

راح الحنان وانفقدت معاني الرحمه

و اختفى عن عيني كل شي غالي

مافي كثر روحي بوجود الفرح متوَهمه

مافي كثري بيموته الوله ولايبالي

براك

زهيري

دمعٍ غرّق الوجنات يناديك..مِشّه
ارحم المهموم اللي دمعته..برِمشَه
نخيتك الألم اللي بالصدر ...مَشَّه

إبعده عنّي منه البدن ....إنسَم
ياللي قبل لاتنطق قلتلك ...سم
من رحت  ماني قادر...اتنسّم

كأنّه الموت على روحي ...يتمشّى

براك

بِرِي



تحتاج عيونك دلاله؟

كل مافيها  ينقرِي

 أسهل من السهاله

أدري شاللي  ينطري

انا راسم لك  حاله

تبيع فيني وتشتري

بسبايب نظرة جتاله

خلّتني من عقلي بري

خلت حالتي  حاله

لاتنكتب لاتنقال لاتنقري

تلحّني






تالي الليل تاخذ أوتار الوله تعزفها 

على انغام الشوق تاخذني تلحّنّي

ألحان حنونه أحبها مااقدر اوصفها

تذوبني ولآخر مدى للحس توصلني

سَرَت باليوف ولاأقدر حتى اوقّفها

لو أنوي كل شي فيني  يردني

جنون؟؟ هالمرحله انا اصلا طايفها 

منو بس يحبّك حبيبي اكثر مني

تالي الليل نسمة ذكرياتك لاطفها

هوى لي حدود السما أخذني

هوى خذا الروح سَحرها وجتّفها

وحسيت بدقات قلبك بحضني

بالليل مابقت جروح ماأنزفها

بالليل مابقت أنّه ماتتعّبني

بالليل تاخذ اوتار الوله وتعزفها

بالليل ترسمني تاخذني تلحّني

براك

الله ادرى

الله ادرى

أحس الروح مني

إتّبرى

راحت مني

ذوبها حزني

كل شي قمت أخسره

الله أدرى

الله أدرى

.....

تشربني همومي ويعطّشني الألم

أرويها مرات بجرّة قلم

ماتكتفي تبي زود

ماللشقى عندي حدود

ابد بالمرّه

والله أدرى

الله أدرى

......

يوقف الوقت على لحظة غيابك

تصير الأوقات لحظات موادع

شناديك وأنا محروم جوابك

عمر الوقت مارَحم ضايع

ولادارى عَبْرَه

والله أدرى

الله أدرى

براك

نسمات خنينه







انت الحب اللي باليوف اشيله

والهوى اللي أتنسّمه وأحيا به

النسمات العطره الخنينه العليله

والسؤال اللي ماأبي له إجابه

أعرف ان الليالي بليّاك ثجيله

يخقها الوله حيل وتقتلها الكآبه

وأعرف ان قلبك ماألقى مثيله

أحبه اعشقه اغليه وهم أهابه

مثل ماشالني قلبك انا باشيله

مو بس اشيله انا احيا به

براك 

احداث حزينه


مو خوف هي مسأله منت فاهم معانيها

صارت كل حياتي بإيدياتك رهينه

 حاله مابين الأحاسيس وخوافيها

 واقع مر وبنفس الوقت اشزينه

لو فهمتني جان احلامي عرفت أمانيها

لو تحسني جان لقى قليبي من يعينه

هي مسأله تناصف كل اختلاف فيها

هي سالفه مجنونه غريبه حزينه

ماهو خوف بس مسأله ماتفهم معانيها

انا صارت كل حياتي بإيدياتك رهينه

براك