Tuesday, November 29, 2011

ياحكومه تكفين



اذا كنت مواطن يحترم الانظمه والقوانين

مااحب السياسه مااشارك  باعتصامات

مااقول هذا بواق هذا حرامي لعين

ماتحجى عن وزراء ونواب ونائبات

شنو جزاتي ياحكومه قولي تكفين

قولي قبل لاأستخف قوليلي زتات

انا مواطن صالح ماأسولف بدواوين

ماأصفط غلط ماأطوف حتى الاشارات

ماأعرّض نفسي لمساءله وجيم وسين

ماأشوف أخبار مااتابع مسلسلات

ترى انا مواطن انطع من الدارسين

منهنه غير شكل حتى أقط قطّات

ياحكومه شتبين اصير .. شتبين؟

ماقلت ابي اراضي عقارات وسيارات

المفروض تعطين كادر للراكدين للمخلصين

اللي يمشون يم الساس بهدوء وسكات



Friday, November 18, 2011

لاتشعل النار



لاتشعل النّار ..  حاول انك تطفّيها

الجسد..... مايتحمّل حروقٍ كثيره

هدّي النفوس... والعقول حاول توعّيها

إزرع بالناس حب.. وألفه ..وغِيره

 على أرض مالنا عيشه إلا فيها

وحب يدلّي اللي ماعندهم بصيره

باجي للعين أمل تشوف ....لاتعميها

خل النور يداوي قلوبٍ  وكسيره

الكل ملزوم عليه هالأرض يداريها

يحطها بعينه ..ويصحَى ضميره

الفتنه موجوده ..لانحاول ننفيها

ترى هالكلمه  ..كئيبه..كبيره

النار إذا إشتعلت مانقدر نحتويها

طول عمرها النار جبّاره وخطيره

كل واحد  شغله وحده بس يسوّيها

لازم يحط بين عيونه هالديره

١٨-١١-٢٠١١

الجمعه

يرفرف علمنا


مو منّا ياديرتي

 مو منّا

إحنا نبيلج الخير

فيه ناس

ودها تفرّقنا

مو منّا ياديرتي

 مو منّا
....

إحنا عيالج

إنتنشّق ريحة يالج

وعبير سِيفج

إحنا بوقت الشدايد

سَيفِج

إنتي عيونّا

إنتي روحنا

إنتي دانتنا

مو منّا ياديرتي

 مو منّا

......

يالغاليه تحمّلينا

 مو بيدينّا

الويوه تغيّرَت

والصدور ضاجت

والأرواح الوفيّه

مالقت

 اللي تتمنّى

مو منّا ياديرتي

 مو منّا

......

بيتغيّر الحال ... نوعدج

يالحبَيْبَه .. يالدّانه .نعاهدِج

خيرج اللي شفناه ماننساه

رغم الألم والغصّه والآه

يبقى بقلوبنا

يرفرِف عَلمْنا

مو منّا ياديرتي

 مو منّا

.....

الحلول بنلقاها أكيد

 الدّوني ماراح يستفيد

ولانرضى بسمتِج تروح

إنتي الكيان و الروح

إنتي النبض

اللّي ساكنّا

مو منّا ياديرتي

والله مو منّا

......

ياديره عيالها إقهرَوا الغزو

مالهم مكان بيناتنا اللّفو

باجر أحلى صدقوني

ياهلي سمعوني

دايم عالي

بيرقنا

مو منّا ياديرتي

والله مو منّا
.....

قلبي عليج يالعزيزه عوّرني

كل يوم خبر كئيب يذبحني

كل يوم خنير باليوف يطعنّي

ياكويت دمعتي على خدّي

غير الله سبحانه ماعندي

يارب آمنّا بوطنّا

يارب آمنا بوطنّا

يارب آمنا بوطنّا

يارب آمنّا بوطنا

يارب آمنّا بوطنّا

يارب آمنا بوطنّا

يارب آمنا بوطنّا

١٨-١١-٢٠١١
الجمعه

Saturday, November 12, 2011

على هواك





على هواك
أنا طير بسماك
جناحه ينطوي
بنسمه منّك
ويرفرف بلقياك
على هواك
......

على نسماتِك أتنفّس
تبتدي الحنايا تِحِس
بروح تسكِنها
تِحس إنها
قطرة ندى
وذابت بحشاك
على هواك

......

وعلى هونك علَيْ
شوي ...شوي
طيرك مو قد هالأشواق
طيرك قلبه خفّاق
على هونك ياملاك
على هواك
....
بالهدا بالهدا ياعمري
يانبض الحياة بصدري
ياكِل الحُب
إرحَم هالقلب
مايتحمّلني قلبي ويّاك
على هواك

الاربعاء ٢-١١-٢٠١١

Saturday, November 5, 2011

إبتِســَم



وإبتسم

وإبتسمت دنيتي

ورسَم

حياتي وخطوتي

ودلاّني دروبي

درى إنّه للوله

ألَم

وإبتسَم

......

رَد وأحيا خفوقي

وسرى الدّم بعروقي

و ردَّتْ روحي

ونوّرت سماي فيه

كل شي أقدر أسمّيه

إلا حسنه

ماعرفتلَه إسم

وإبتسم

......

حَس بالقلب إلتاع

أنهى موضوع الضياع

بضحكَة سِنّه

اللي من أشوفها

ماأقدر أرِد

النّسَم

وإبتِسَم

Thursday, November 3, 2011

بريحَـــاتَــــه



من كثري سهر

من كثري حاتَه

من كثري

ذاق المر

بحياته

وظل ساكت

شابع قهر

شابع شماته

من كثري سهر

من كثري حاته

......

صُبرت ..ولانِلت

ياما حجيت وقلت

ومحدٍ سمعني

الزمن كسَرنِي

وسوَّه فيني

سواتَه

من كثري سهر

من كثري حاتَه
......

كنت يمّي .. وأحاتيك

كنت يمّي .. وأناديك

كنت .. وكنت .. وكنت

شاخَذْت منّك ..إنت؟

جرحت القلب

وخطّيت نهاياتَه

من كثري سهر

من كثري حاتَه

....


شاقول ؟شانطِق؟ كافي

غامض نساي ومجافي ؟

وشيفيد الصبر شيفيد؟

يوميّه جرح يديد

وقليبي بريحاتَه

من كثري سهر

من كثري حاته

٨-٤-٢٠١١
الجمعه