Thursday, February 25, 2010

أوووه يامااااال




شايب يحازي أحفاده بيوم العيد الوطني

تدرون شنو الكويت
ياعيال
الكويت نسمة هوى
تذكّرنا برجال
عطاياهم كريمه
سواياهم عظيمه
عطت لهالبلد معنى
اللي كِتَب وتغنّي
واللي نَحَت ورِسَمْ
واللي ينهم 
بأووه يامال
تدرون شنو الكويت
ياعيال
.....
ديره إنبنت على الطِّيبَه
ناسها طيبه وحَبيبَه
كانوا عالبحر يترزّقون
الفقر جبرهم يتعاونون
كانت تِنرِسم معاني الوفى
على اليال
تدرون شنو الكويت
ياعيال
......
ديره إنغزَت وتحرّرت
ماضرّت حتى لو تضرّرَت
إرسموا الشهداء رسمه جميله
لها معاني كبيره وأصيله
معاني تختصر كلمه
إستبسال
تدرون شنو الكويت
ياعيال
......
الكويت أكبر من زينه
وأنوار تضوي المدينه
الكويت حبها بقلوبنا
بكلامنا وبإسلوبنا
حب الوطن موزينه
نونّس فيها اليهال
تدرون شنو الكويت
ياعيال
.....
عيد هالوطن مو عطله
ووزارات ودواير معطله
ومسيرات ورغوات وهرنات
حب الوطن يحتاج إثبات
ويحتاج أفعال
فهمتوني ياعيال
١٨-٢-٢٠١٠
الخميس

Sunday, February 21, 2010

فتح غمّـــض


ودّي أفتّح وأغمّض

وأكون بالسويد مشتّي

وفي باريس مصيّف

وبكوبنهاجن مرمّض

ودي أفتّح وأغمّض

......

ودي حلمي أشوفه بغمضه

وأهلّي الروح بطعم الراحه متلمضه

أذوق طعم الأناسه

أبتعد عن النّحاسه

ماأحش ولا أقرِض

فتّح غمّض

.......

لما الواحد يسافر يتغيّر

شعور الإرتياح فيه يكبَر

ومؤشر السعاده يِرتِفِع

يطق رقبه وصبع

ويخلي الطمأنينه بقلبه

تِستَعرض

فتّح غمّض

....

السفر يطيّر العقل

ينسيك معنى الثّقل

السفر يبيله بيزات

واحد غرقان دولارات

واليورو بعرجه ينبض

فتّح غمّض

......

يالمفلّس إقضب أرضك

ياعل مفهوم الفقر يرضّك

إشبع أقساط وفلَس

سيف الديون فيك إنغرس

وخلاك متخضخض

فتح غمض

....

ماعندك !! لاتشيحط وتسافر

مردّك ... بترِد وتقرّض الأظافر

من الحسره والقهر

ماتقدر توطوط حتى مصر

خلك بويل الحسرات

متمضمض

فتح غمض

....

ناس قادره تروح فيينّا

وناس الصبيه عندهم جنّه

ناس تحجز درجه أولى

وناس أحوالها هوله

كل ماتنوي السفر

تستمرض

فتح غمض

٢٠-٢-٢٠١٠


متلمضه : وتنطق الضاد ظاء يتلمّض أي يتذوق الشئ وهي لصق اللسان بسقف الفم أي ((اللهات)) ثم مداعبة السان للهات أكثر من مرّه حتى يستشف الطعم المراد تذوقه عادة يقوم بها بعض التجار عند التفكير بقول مؤثر وعند الفقاره آو الفقراء يتلمظون بالسكيك الظهاري بعد الغدا
الاناسه : الوناسه
النحاسه : اللعانه ويطلق على اللعين نحيس
تقرض : النميمه والجمع قراظ وتنطق القاف جيما فارسيه
يرضّك : يقلبك رأسا على عقب مثال جسّوم رض خلود رض أي تمكن منه وطرحه ارضا
فلس : بفتح الفاء وتسكين السين أي الإفلاس
متخضخض : أي مهتز والخضخضه هي الإهتزاز الشديد
لاتشيحط : الشّحاطه بتشديد الشين هي الاعتزاز الشديد بالنفس إلى درجه الغرور
توطوط : تصل
متمضمض : من المضمضمه
هوله : بضم الهاء اي الشكل الكئيب الغير مرتب
مثال فلان شكله هوله
أو شهالهوله

Monday, February 15, 2010

زهيرية تظلّمت



أحس باليوف من الصبر طعنــــــه

هذا الهوى أمر ولأمره طعنا

لاإرتحنا ولا مثل النيمه سطعنا

أظلمت الدنيا بعيوننا أظلمت

ومن أمر الهوى الروح تظلمت

ياما هالدنيا برّت وإظلُمَت

أنا وقلبي عاندنا وماطِعنا


١٧-١٢-٢٠١٠
الخميس

Wednesday, February 10, 2010

واللي يخليك


ماتتحملني

روحي عليك

ماتقدر على حبك

واللي يخليك

أرحم من سعى لدربك

وخاف فيني ربك

واللي يعافيك

ماتتحملني روحي

عليك

.....

مالقيت لشوقي مقياس

تدري فيني وايد حسّاس

ووايد أحبك بإخلاص

وأبيك

ماإتحملني روحي

عليك

.....

آتحمل زود وأهواك

وروحي تامّه معاك

وياك ياماي عيني وياك

يابخت اللي

يحاتيك

ماأتحملني روحي عليك

٢٨-١١-٢٠٠٩
الأحد

Thursday, February 4, 2010

الحمد لله




إنتحمَّد ربنَا

لما نشوف زلزال

هدم بلحظات

معنى للحياة

إنتحمّد ربنا

......

نشوف أطفال تتشرّد

ونشوف ناس مقرّد

اعصار دمّرهم

 زلازل شالتهم

فيضان شرّدْهم

وإحنا من البرد تلحّفنا

إنتحمّد ربنا

......

أمهات تدوّر عيالها

وعيال إندفنت آمالها

وإحنا عايشين بأمان

عايشين بأجمل مكان

كل هذا معناته

الله يحِبنا

إنتحمد ربنا

.......

منو حَس بطفله يتيمه؟

قصّتها جدّا أليمه

شافت أمها تموت

صار الألم زاد وقوت

ترى لوما عمل الخير

جان من زمان رِحنا

إنتحمّد ربنا

......

قولوا آمين عساها تظل

كويت العز كويت الأمل

يظل الأمان بيت وحضن

ويظل أجمل وطن

نشيله بعيونّنا

مثل ماهو شايلنا

إنتحمّد رينا

.......

لإننا طيبيين وايد مرتاحين

نصير حامدين شاكرين

فيه ناس محتاجه لُقمه

الدنيا بعيونا ظلمه

ناس تصرف ملايين

وناس محتاجه قِطنه

إنتحمد ربنا