Saturday, September 26, 2009

لاإنبربس



مرات الأفكار

تاخذ عقلي وتترِس

حجي واحد فاهم

وواحد منفّس

واحد ودّه يصير عَالم

وواحد حلمه يكون مدرّس

مرات الأفكار

تخليني انسان

يهذي

ويخربط 

ويوَسوِس

،،،،،،،

أتخيّل مدينتي الفاضله

اللي ماتعرف معنى المجامله


مدينه ملوّنه مزيّنه

مدينه هاديه خِرمِس

مرات الأفكار

تاخذ عقلي

وتترس

،،،،،،،

أرتّب كيان وطن


وأتخيل الوضع بكيفي

علمت روحي ماتِإن

ولا أدفع بسبب غلطات.... الثمن

أسهّل كل الأمور

أرخّي وأيبِّس

مرات الأفكار ترفع

والينون يجبِس
،،،،،،

توصل  قوانيني لحدود سومطره

أسمع لفيروز وكواسير البصره

ومنغّم أفكاري على نوته مضبوطه

أحس إني عايش مو خربوطه

إنسان له مبادي

اللي بقوله

خافوا الله

ترى ربكم يخفِس

لا إنبربس

٢٦-٦-٢٠٠٩
الجمعه


تترس : تمتلئ
يهذي : من الهذيان أي كلام غير مفهوم
خرمس : بكسر الخاء والميم وتسكين السين أي الظلام الدامس حالك السواد (( كيف حالك )) وبإضافة النون بالإماراتي حالنك
مفاهيم الصحن : مفاهيم تجبر أن لايتعدى التفكير حدود طبق الطعام
أيبّس : بتشديد الباء أي التعامل بصلاده مع ضربه قويّه
مثال : لاتيبّس مع روبرتو كارلوس



Wednesday, September 23, 2009

قلايد حرير




من أشوفك

يخوني التعبير

بحالة ثانية اصير

 ملامح إنسان

روحه بين ضلوعه

 بتطير

من أشوفك

يخوني التعبير

،،،،،،،

أشوفك بغير شكل  صورة

أشوفك بدر مكتمل بنوره

اشوفك بأوصاف بيضا

مالها بهالوجود...... وجود

أشوفك طرّات نور

ملفوفه بحرير

من أشوفك

ماأدري شيصير

23-9-2009

الأربعاء

Monday, September 14, 2009

غياب عظيم

كتبت بمناسبة مرور ٦ سنوات على وفاة أبي

------------

هَل الشهر الكريم
يبا غيابك عظيم
قطّع أوصال القلب أوصال
كلام وايد عندي بينقال
بس أخاف ربي
الغفور الغفّار الحليم
هل الشهر الكريم
،،،،،،،

يبا ..... هالكلمه ماأقدر أنطقها
يبا .... على كِثر ماأحبها وأعشقها
راحت وياك راحت
ناحت الروح ناحت
جرح غيابك أليم
هَل الشهر الكريم
،،،،،،،،
ناقصها شي جَمعتنا
تيتّــمت فينا فرحتنا
رغم السنين السّته
عمرها الدنيا مانسّتنا
حبك بصدورنا مديم
يبا غيابك عظيم

٢٠-٨-٢٠٠٩
الخميس