Thursday, July 30, 2009

راحت سنين



راحت سنين

كبرَت الأشياء بعيوني

ويزيدون للي يبوني

ويمضي العمر بلحظه

تتراكم الأحداث بأفكاري

وأتعلّم من سوايا أقداري

أصير خال

أصير عَم

أصير أُبو

وأنا أدوّر اللي يعين

وراحت سنين

،،،،،،،،

واعي لك يازمن .... واعي

تكبّرني ويكبر فيني العمر

تتطبّع فيك كل أطباعي

وذكريات تروح وتمُر

والله يصبّرني على الياي

اللهم آمين

راحت سنين

٢٠-٧-٢٠٠٩
الأثنين

Sunday, July 26, 2009

Mac book

فجأه عقدت العزم على المضي قدما لعالم الماك  وهو نظام يختلف تماما عن نظام الوندوز  وبصراحه صارلي فتره لم انجح في دخول هذا العالم الجديد ولم افهم شيئا بهذا الجهاز الغريب
 
ومن حر مافيني كتبت


هذي حاله ويّا هالماك
شسويّت بعمرك يابراك
تأذيت وتمرمرت
تعذّبت وتغربلت
تبي تتفنتق؟؟
عيل خذ جزاك
انت من صجك ماك
،،،،،،،
عابل بنفسك وإحتار
حتى عقلك من راسك طار
صار كل شي بالمنكوس
تحس داخل عقلك طوس
وتسمع صوت ليوه وراك
عاش راعي الماك
،،،،،،،

لاتقدر تنزلّك صوره
قاعد كإنك أبجوره
لافايده ولا عايده
مشكلتك وايد جايده
شمسوي بعمرك الله يهداك
انت وين ووين الماك
،،،،،،،،
تبي تطلع فيها ياشاطر
هذا إنت قاعد وساطر
ماتدري شاللي يحوس حواليك
ميوّد بيبسي وقاضب فليك
والبطاط يطالعك هناك
ٌإنت من صجك ماك
،،،،،،
قبل هبابه تبطّل الجهاز
اللحين للمساعده معتاز
تبي اللي يتفرغلك؟؟؟!!؟
تعوذ من ابليس أبركلك
نعّز الشاشه
وشوت البلاك
بلا تقدم بلا تجديد بلا ماك

يتفنتق : أي يخترع شيئا جديدا
عابل : أي واجه أو إعمل أو بالمصري إحترس نفسك
بالمنكوس : بالمقلوب
طوس : والمفرد طاسه وهي أحد الأواني المنزليه ويشرب بها الماء أو اللبن
ليوه : موسيقى شعبيه فيها لويه  
ساطر : أي جالس ينتظر
يحوس : يتحرك بإتجاهات متعدده
الفليك : شيكولاته
 هبابه : بالكاد
معتاز : محتاج
نعّز : بفتح النون وتشديد العين أي أبعد مثال : نعّز (أبعَد ) براك ابريق الشاي إيدي كده بوزي كده اصب الشاي وأرجع كده

Thursday, July 23, 2009

مدى نبضه

تاخذ آخر مدى بإحساسي وتوقّف نبضه
وتبعثر بداخل يوفي قطرات عذبه نديّه
تعلّم القلب شلون ينكسر ويرضى
ويفهم ببساطه شلون تمشي هالدنيا
أصير إنسان مايعرف سماه من أرضه
ومن جليل ذكرياتك يتنشّق  حنيّه
لو رحت عني الهوى من الصدر يفضى
وأهوجس بكلام ماأعرف أوّله من تاليّه
يوصل لآخر مدى بإحساسي بتكوين النبضه
ويبعثر بكيان روحي قطرات عذبه نديّه

٢٠-٣-٢٠٠٩
الجمعه

Tuesday, July 21, 2009

زهيرية العوافير


عوافير باليوف بسبايبكم عوافــــير

ياكثر ماعندنا خير كثير ووفــــــير

محد فاهم شنو يعني حساب التوفير


العموم حسابه بالبنوك مصفـــّر

تلقى الواحد هلكان ويهه أصفر

بس باجي يشق جيبه ويصفــّر

جما البلابل والعصافـــــــــــير

25-2-2009
الاربعاء

Friday, July 17, 2009

جبروت أنّه




تبي تفاصيل أكثر؟؟

تبين  هواك شيسوّي

تبي تفاصيل أكثر

تحسسك بالأمان

تبي أحلف ولهان

تبي آبجي

تبي أشكي

تبيني أتعبّر

تبي تفاصيل أكثر؟؟

،،،،،،،،

ودك تفهم اللي صاير

شمنّه

ودك قلبك تطمْنَه


من غبت 

وأنا خيال إنسان

راسمه حالته عيونه

من غبت 

والحزن كوّن لي كيان

وتلوّنت بلونه

ملامحي ذابت


وجفوني شابت


أحس ضلوعي بصدري

تتكسّر

تبي تفاصيل أكثر؟؟؟؟

،،،،،،،

تقدر تتحمل عتابي

ووله  بالصدر رابي

وإتفهّم نفسك إني ضعت

وإني بهالحياة إنغصبْت

مابيدي غير أحمد ربي

وأتشكّر

تبي تفاصيل أكثر ؟؟؟؟

،،،،،،،

هاك ... خذ من هالأنّه وإسمع صوتها

شوف نبراتها وشوف جبروتها

لاتسمع دقات قلبي .. بس إفهم

ترى الوله لو ألتم

بيوف عاشق
يأذّيه

تحمّل حبيبي 

أنا وايد أتأثّر

وماعندي أكثر

Tuesday, July 14, 2009

مايد

بعدت  بعيد وايد
ماأسمع وماأشوف جرايد
لاهي بتذكرتي وغرفتي
غيّبت نفسي عن دنيتي
ريّحت عقل فكّر كثير
خليته من راحته يطير
ويترحم على جرحه
الجايد
بعدت بعيد وايد
وايد
،،،،،،،

لاأحاتي مآسي مروريه
ولامجلس أمه وأذيّه
ولا القبس قالت والوطن ردّت
ولاخلّود وصل
ولا ريموه تجدّت
ولاهمني مضحي
وزايد
بعدت بعيد وايد
وايد
،،،،،،

رحت لديرة خليفه وطحنون
ديرة اللي ييولون
شفت للكرم فنون
يازين دار
حِليله مايد

بعدت بعيد وايد


١٣-٧-٢٠٠٩
الاثنين

Saturday, July 4, 2009

طيب


ماخليت لك طيب

أذكره لو تغيب

ماخليت لك طيب

ماخليتلي صوره 

ملامحها مبتسمه

ماخليت بخيالي رسمه

تجبرني اكون منك قريب

ماخليت لك طيب

،،،،،،،

ماخليت لحظه حنونه تفاصيلها

كل لحظاتك جارحه تواصيفها

شاذكر بس الله يهداك

ماعمره حسيت وياك

إنك حبيب

ماخليتلي طيب
.....

ماخليتلي شي الا وكرهته

يكفي إنك إنت ..إنته

لاإحساس لاقلب لاروح

روح بحفظ الله روح

كل شي قسمه ونصيب

ماخليتلي طيب

٢٣-٦-٢٠٠٩
الثلاثاء