قلايد ذهب

تحت الهدب
تلقى تعب
وتلقى حرف ماانكتِب
ناطر صفحة عيونك
تهديني دلايل بوحي
وتردلي بقايا روحي
وصوتي اللي إنسلب
تحت الهدب
تلقى تعب
،،،،،،
تصدّق!! كلمتي تعبت تنزف
تصدّق !!ماتعلّمت أعزِف
إلا وأوتار نبراتي مشدوده
تصدّق!! صرت أهذي بإنشوده
ماتعرف للأوزان طريج
تصدّق الكلمه تنشّف الرّيج
تصدّق مشكلتي إني
وايد أحَب
وتحت الهدب
تلقى تعب
،،،،،،
والله وبالله مابغيت أتكلم
بغيت بصمت فيك أتحلّم
بس التعب غصبني
والله مو مني
إنت السبب
تحت الهدب
تلقى تعب
،،،،،،
شي موحش لو تكون شاعر
تحس بداخلك وحش كاسر
يفترس أحاسيسك ويهزمك
ماتلقى أحد يفهمك
تحس بنشوة إنتصار
وكل مافيك إنغَلب
تحت الهدب
تلقى تعب
،،،،،
إسمعيني ياأيامي إسمعيني
واسمعي صرخات حنيني
ماأبي إجابة أبي رحمه
أبي تقدرين مفاهيم الكلمه
اللي بصدري ماهي حروف
اللي بصدري
قلايد ذهب
وتعب
30-4-2009
الخميس

بووليد

كتبت بمناسبة زواج اخي خالد

ــــــــــــــــــــ

بووليد

ليش أحس بالعيد

وطيور تحوم حواليك

وكل الغيوم تناغيك

والبهجه كلمالها وتزيد

يابووليد

،،،،،،

ماتشوف عيون اللي يحبونك

كلهم بحب ينادونك

فرحتهم غطّت الكون

إفرحت قلوب وإدمعت عيون

شفت شلون الصبر يفيد

يابووليد

،،،،،،

زوجناك والألم بقلوبنا

ذبح أرواحنا وصدورنا

ماكان ويانا بوبراك

تأكد كان فرحان هناك

وماكان عنّك بعيد

يابووليد

،،،،،،،

شفت عيون أمك

كانت بشوق تضمّك

وعيونها غورفت على جتوفك

حسيت بلمتها بحنايا يوفك

ياعلك دوم سعيد

يابووليد

،،،،،،،

أدري خطبتلك وماسديت مكانه

أدري لوشما أسوّي أنا

ماأقدر اعوضك حنانه

العين بصرت

وقصرت الإيد

يابووليد

غزو

تذكرون أيام الغزو

يوم المحتل ذبح كل شي حلو

تذكرون أيام الإغتصابات

تذكرون أيام الإعتقالات

تذكرون أيام الباصات

اللي شالت شباب الكويت

وراحت لنينوى والبصره

وعند الناس اللفو

تذكرون أيام الغزو

،،،،،،،،

تذكرون السيطرات

وأهل العرق والهوسات

وصيحات الماجدات

ماكان في كويتي واحد

يقول : أنا شكو

تذكرون أيام الغزو

،،،،،،،،،،

تذكرون دموع جابر

يوم بجى على الديره

وربّى بدمعته مشاعر

وخله حب الوطن سيره

تذكرون يوم الناس كلهم

عشانه صفقوا ووقفوا

تذكرون يوم الغزو

،،،،،،،،،،

تذكرون عيال كيفان

خلوا المنطقه ميدان

وداسوا على روس المغتصبين

وعلموهم شنو يعني كويتيين

وشنو يعني ندوس العدو

تذكرون أيام الغزو

،،،،،،،،

تذكرون يوم على السطوح كبّرنا

وسمّعنا برنا وبحرنا

الله وأكبر على الظالم

وإسمعونا كل العالم

وقالوا ونعم فينا

والله كفو

تذكرون أيام الغزو

،،،،،،،،

تذكرون يوم الضربة الجويه

يوم إشبقتنا الدنيا

وكان الأمل يبرق

وكانت القلوب تخفق

وطارت أسراب المحتليين

مثل الطفو

تذكرون أيام الغزو

،،،،،،،

تذكرون يوم حلفنا نحب الوطن

ومانخليه مهما دار الزمن

تذكرون إغنية وطن النهار

اللي بجتنا كبار وصغار

منو مابجى يومها منو

تذكورن أيام الغزو

،،،،،،،،،

تذكرون حقول البترول يوم حرقوها

وعيال الكويت بعزيمتهم طفّوها

ماهمهم نار ولا حروره

كان حب الوطن ضروره

ماخافوا دخان وإلا ربو

تذكرون أيام الغزو

،،،،،،،،،

أبي أذكركم بذيج الأيام ياكويتيين

شوفوا انتو شتسوون اللحين

صرنا كلنا مفترقين

ماقمت اسمع كلمة كويتي

بس سلف - اخوان-شيعه-حضر

وبدو

تذكرون الغزو

زهيرية خدّه

إرفق على عليلٍ من صدّاتك تخدّه

من رحت عنه ودمعته بخدّه

همومه لحافه وجروحه مخدّه

من صد عني وأحوالي مهي بزينه

العقل من فراقه اختلت موازينه

يخطي علي وأقول وازينه

تنوّر دنياي من نور خدّه

ــــــــــــــــــــــــــــــــــــــــــــــــــــــ

تخده:اي كان مدركا وأصبح لايدرك أي تائه والصفه هي مخدّي بتشديد الدال ويطلق على الرجل او المرأه الكسلانه خدايوه

بخده : أي الخد

مخده: اي الوساده

مهي بزينه : ليست بجيده

موازينه : اي ميزان العقل

وازينه : اي ماأجمله

ياعيالي

: رسالة إلى ابنائي

ياعيالي ياعيالي

لاتخافون علي ياعيالي

اذا خذوني عنكم

اذا منعوني منكم

انتو ببالي

ياعيالي

,,,,,,,,

ماأوصيكم تجيبون لي ميرندا

ولحاف ومسواك ومخده

وزرعوا صوب البيت ورده

وداروها بدالي

ياعيالي ياعيالي

,,,,,,,

يمكن يقولون ابوكم نصاب

يمكن يسموني الكذاب

ومثال سئ للشباب

أو مالي والي

ياعيالي ياعيالي

,,,,,,,

يمكن يسموني لص المدونات

مجرم كريه عدو الإنصات

هيهات يايبا هيهات

تراني ابوكم الغالي

ياعيالي ياعيالي

,,,,,

يبا الحريه طوق ورد لبسوه

يبا الوطن بعيونكم حضنوه

حبوه إحموه داروه

وكملوا باجي آمالي

ياعيالي ياعيالي

,,,,,

إنطقوا بالحق أبد لاتخافون

يسوّون اللي يسوّون

غير الله لاتهابون

ياراس مالي

ياعيالي ياعيالي

21-4-2009

الثلاثاء

مالك شبيه

لو لك شبيه

جان طمّنت قلبي

ولاتعنيت بدربي

ولايبقى شي بالدنيا

أحاتيه

لو لك شبيه

،،،،،،،،

وين ألقى ربع طيبتك

إحساسك إخلاصك حنيتك

رحت عني وضعت وإنتهيت

ماغير على همومي صفيت

والحزن وين ماألتفت

ألاقيه

لو لك شبيه

،،،،،،،،

لو ألقى مثلك ماأحاتي

أقدر أعيش حياتي

أعيش مهتني ماأحتار

ماأخاف مهما صار

بس عمري مالقيت

اللي أبيه

لو لك شبيه

،،،،،،،،

مالقيت اللي على أشواقي يداري

بعدك ماشفت للفرحه محاري

ماغيرك يطربني بحس إسمي

ماغيرك يوريني ملامح حلمي

ياراحة القلب

وأمانيه

مالك شبيه

Paris

يامن ياخذني ويوديني باريس

إسبوع بس أقط همومي هناك

أنهي موضوع الملل والهواجيس

والحره والغلقه والزعل والإرتباك

قطوني هناك لاأنيس ولاونيس

بروحي أكوّن لي نجوم وأفلاك

باخذ وياي خبز إيراني وهريس

2pacوسي دي لرويشد وأنغام و

هي ديرة تبعد عني كل الوساويس

ديرة تصنع البهجه والفرح لبراك

أروح السبت ارجع ضحى الخميس

أتريّق مع ميشيل وأتغدى مع جاك

شسوي غير اني اتعوذ من إبليس

sacوأحلم اني بالشانز شاري

يالايواد تكفون ودوني باريس

مابي شي منكم بس ودوني هناك

،،،،،،،،

،،،،

،،

،

حقيبه باللغه الفرنسيه :sac

الله على المفتري

للأسف راعي الحق على هالأرض قام يعري
والمصلحه والفوضوية مكسره مياديفه

قمنا نفرق بين سني وشيعي وبدوي وحضري

المنظر العام للوضع صاير هُولَه وشيفه

اللي يمدح الحرامي ويفخر ويمجّد المفتري
واللي الشيطان صار أخوه وعمّه وحليفه

تنقاله أشعار تصك على المتنبي والبحتري

وتصير الحوارات مبهمه مجنونه وعنيفه

للأسف كثروا الناس اللي بيردونا قري

وقلوا الناس أصحاب الأيادي النظيفه

ياورده

هالجو مال

ياورده

http://barrakiyat.blogspot.com/2009/04/blog-post.html

عيب

طلبت من اخي العزيز (شفيف الثنايا ) ان يكتب رساله للموسيقار غنام الديكان لكي ارسلها انا من هاتفي الخاص

اليكم مضمون الرساله


فنر هالدار ...
تعب يضوي...
ولابانت مضاويكم
ظما هالدار ....
متى تروي
موق منهو يرجيكم ؟

وبعد دقائق معدوده جاء الرد من استاذي غنام الديكان الذي يعالج في الجمهوريه الفرنسيه

بإذن الله راح يضوي بمضاوينا
او مضاويكم
عسى الرحمن يجمعنا
ونفرح في تهنيكم


واتصلت بالاستاذ غنام وقلت له : عمي ولهنا عليك ترى الكويت ناطرتك ولهت عليك

قال : انا اكثر والله راجع فيكم الخير والله
أحسست بصوته فيه حزن فيه ألم
لماذا هذا الالم لماذا هذا الجحود لفنان عظيم

غنام الديكان ثروه وطنيه
غنام الديكان جمله موسيقيه تعشق الكويت
غنام الديكان رمز وطني
غنام الديكان قيمه فنيه بعطائه بأخلاقياته
تعلمنا منه كيف نسمع الصوت الكويتي
والايقاع البحري والنهمه واليامال
لماذا كل هذا التجاهل
،،،،،،
جائني اتصال في نفس اليوم من صديق اخر عزيز وقال لي براك اسمع واسمعني مقطع لاغنيه اعشقها لأنغام ( إنت إيش ) من يرد الماء للسما لانت قادر او انا
قلت له : هل هذا الكلام يخص الكويت
قال : كل الاحداث الجاريه تدل على هذا المعنى
قلت له : لماذا يتجاهلون غنام الديكان والرموز الفنيه والثقافيه لماذا
قال : من يرد الماء للسما
قلت : بس هذا غنام اهو اللي علمني شنو يعني الفن الاصيل شنو يعني تتغنى بحب الكويت
قال : من يرد الماء للسما لانت قادر او انا
قلت له : فمان الله

انتهى الحديث


الم اخر

بدر القطامي توفاه الله قبل فتره بسيطه اهديت له ديواني الاول وقلت له : عمي اتشرف ان اسمع ردك وغاب غاب ،،، ولم اسمع رده الى الان
لماذا لا نهتم بهؤلاء المبدعين في حياتهم وعند مماتهم بدر القطامي قضى وقته وريشته المعطره بحب الكويت لاترسم إلا سور الكويت او يال الكويت لوحاته كانت ومازالت تحدثنا عن تراث هذا الوطن الى متى هذا التجاهل
عبدالله القصار رحمه الله مبدع في لوحاته اهتمت به فرنسا ولم نهتم به لانه مبدع
محمد السريع رحمه الله عبدالرحمن الضويحي سعود الراشد عبدالله العتيبي محمد الفايز والكثير الكثير
هل هذا جزاء من احب واثرى هذا البلد
نعم تريدونا ان نهتم بإغنية المطافي أو نتعمق بتوافه الفن وننسى عطاء هؤلاء المبدعين
هل هي حمله مدروسه لطمس التاريخ



http://www.youtube.com/watch?v=Zh3XP9Ubklw

محـــّـــــد

بتتنهّد

!! بتتنهّد

بتبكي دم

بتصرخ بآه

أبد محّد درى عنك

محّد

!! بتتنهد

،،،،،

لو تترجى الوقت مايسمعلك

كل شي بهالدنيا ملـّــــــــك

لانك كتلة من الجذبات

لأنه ضميرك مات

إي والله مات

أنا أشهد

!! بتتنهد

،،،،

كنت تفرح لما تظلمني

كنت ترتاح لما تحطّمني

تعلمت منك الجسى شلون

تعلمت منك شلون أكون

تعلمت إني من الطيبه

أتجرّد

بتتنهد

بتبجي دم

بتصرخ بآه

أبد محد درى عنك

محد

بتتنهّد

،،،،،،،

2/04/2009

الخميس

بلا روح

سهّيتك بكلامي

وطيرتك فوق السما

من هول غرامي

اللي تعبت تِفهِمَه

خليت قلبك يرتاح

وغمرته هنا وأفراح

وأنا حزني

واصل عظامي

سهّيتك بكلامي

،،،،،،،

لاقي لك من يحبك ويرعاك

واللي يمثل السعاده معاك

وكلّي تدمّر بخوف

وصرخه بحنايا اليوف

وجرح بالقلب

دامي

سهّيتك بكلامي

،،،،،،،،،،

خلّك بأشواقي لاهي

وعن آلامي ساهي

أقدر أفرحِك وأنا مجروح

وقادر أعيش بلا روح

أحققلك آمالك

وتنكرني أحلامي

سهيتك بكلامي

26/02/2009

الخميس

كِثرك

موهذا قدرك

ألمك

ولاقدرك

باهدابي أضمّك

قدرك

أحتويك بنبضاتي

وماأخلي بشر على الأرض

يسمع كلمة حب

كثرك

موهذا قدرك

،،،،،،،

أعطيك الروح تملكها

ماتوفّي

أخلي الغرام مني

متشفّي

ولاأقدر

أقول : عطيتك

أحاول أخلق من الشوق

مجرى يجري بالعروق

ويسري بأطراف قليبي

لو إتّعذرلي .... مافهَمتْ

أقول : معاك عذرك

مو هذا قدرك

1/4/2008

الأربعاء