السموحه

فجأة قررت ان اغادر الى احدى الدول وذلك لاني احسست بأني مرهق من مسؤلياتي طلبت الرحيل لعدة أيام وقوبل طلبي بالإيجاب

احببت ان انقل لكم سبب الهروب الكبير قبل اعتذاري

السموحه

سافرت لإني انسان

محتاج يلقى روحه

سافرت

لاني لون شفاف

ضاع بكيان لوحه

السموحه

أببعد تعبت من مسؤلياتي

أببعد دربي عن خطواتي

أبخلق عالم جديد

عالم مرتفع ماتلمسه إيد

عالم الحب هو طموحه

السموحه

آسف ياوقت تعبتني كثير

آسف ياوقت ماعندك ضمير

تعبتني فوق التعب تعب

أبي بيومين أنسحب

وأداوي أنات مجروحه

السموحه

الهروب مرات أفضل حل

تحس الواقع سيف وإنسل

وقطع أوصال أوصالي

أبي أعيش لحالي

النفس والله مذبوحه

السموحه

حبيبتي آسف بس والله مجبور

بإختصار ترىحبيبك معذور

يبي يرسم بعمره سعاده

يبي يلقى بالوقت إستفاده

تعب من دموعه ونوحه

السموحه

30-1-2009

باينه

باينه

جذباتك باينه

ألقاها بتواصيفك

بحروف شفاهك

واضح زيفك

أعرف جذبك

ونماينه

باينه

لاتحاول تخدعني..واضحه

كل شي مْبَينه.. ..ملامحه

اللي مثلي .. يعرف الناس

يفهم قدر الوفى والإخلاص

اللي مثلي

الله صاينه

باينه

25/12/2008

الخميس

معسّل تفّاح

زمان أوّل راح

تنام على سهمك

وانت مرتاح

زمان أوّل راح

ماينفعك لو تبرِّد

المؤشّر معرٍّد

مايشوف إلا تحت

والله وسواها البخت

العموم عقب الكشخه

ماعنده ثمن

معسّل تفّاح

زمان أول راح

،،،،

راح زمن الآجل والنّقدي

اللحين كلّش مايمدي

إقضب أرضك وإسكِت

أول الدينار عليك يتِكتكَت

طيحله اللحين نواح

زمان اول راح

،،،،

الطمع دايما يودّي بداهيه

جيبولي واحد خسران أوايهَه

شسوّيت للديره بفلوسك ؟؟

يامسافر يامسنّع ضروسك

طاح حظّك طاح

زمان أول راح

22/1/2009

الخميس

قـَمره مبتَـسمـَــــــه

تحديث

تمت اضافة قسم براكيات بالمدونه

http://barrakiyat.blogspot.com

تهلّين

بصورة قمره مبتسمَـه

تهلّـين

بنسمه بالعذوبه متعشمه

ذكرى مرتويه بلحظه

دنيا من حسِّك ماتفضى

تـَسكن الروح

قبل العين

تهلين

،،،،،

لأن كل مابالدنيا إنتي

لأنك من العذوبة تكوّنتي

ملزوم أطريج بحياتي

ملزومه تطريج كلماتي

الوله بزود

الوله بزود

وأبي من يعين

تهلّين

،،،،،

ألمح أوراقي ألقاج موجوده

إنتي وطن نسى كيان حدوده

إنتي شي مايتخيّله إنسان

إنتي بإختصار معنى الأمان

كل شي يروح

بس إنتي تبقين

وتهلّين

29/09/2008

الأثنين

غتره بدون قحفيه

إحذروا من لِبَسْ غتره بدون قحفيّه

تراه كلّش ملّش مو سهل إخذوها منّي

تلقى القذله تطل جنها طرف زوليّه

مرّات إسمه خلف أو جليل أو حمنّي

لاتتحرش فيه ترى يأذّيك أذيه

إن وخّرته عنّك يمكن إنّه يدني

إذا كلّمته يجوز يحوكك بصمّيّه

يغربل يشقِي يدوّخ يأذّي يِعنّي

اذا حاشه بفاق ترى جدا عاديه

بس شغلوله غناية عينه رمنّي

أكيد يقط بالدقيقه مليون بدليه

كل محاولاته تروح مِلح عالهبنّي

إذا تنتّف سووله شرّوكه و قطّيه

إن بغى يفارج ترى يمدحون سِدني

بالكم عليه من الناس الجمبازيّه

اللي حواليه تِردح تتكوكس تغنّي

نسفته تكون مثل الناس الهتليّه

بس راكد سَنع كله وقار ومتأني

الحذر من الغتره بدون قحفيه

إفهم يافهيم وإخذها بفهامه مني

13/01/2009

الثلاثاء

خِنينَه

برسم لكم مدينه

تاخذ السّنع وتدينه

محتاره مذهوله

ماكو شي على أصوله

كل ماقالت : شالسالفه

قالوا : الأحوال زينه

برسم لكم مدينه

،،،،،،

كانوا أهلها ينهمون اليامال

كانوا أهلها غاصه وبحّاره

كان مافيه كلام بس أفعال

والجار يباري لزيجه وجاره

يسنده ويحبّه ويعينه

برسم لكم مدينه

،،،،،،

كانوا ناسها نواخذه

يحبون مدينتهم ويعمرونها

والكل حقّه ماخذه

كانوا بأفكارهم ينورونها

كانت أفكارهم خنينه

برسم لكم مدينه

،،،،،،

شوفوا رسمتي وتمعّنوا حروفها

وليش أنا أصلا رسمتها اليوم

شوفوا كلماتي واللي بيوفها

وحسّوا بألم بصدري مكتوم

الكل يقراها

ويغمّض عينه

هذي إهي المدينه

08/01/2009

الحميس

متيمِّــــــــــــد

شلون أبْـــــرِد

وكلّك يسعِــــد

شلون أَبْـــــــرِد

بعيونك تفاصــــيل الدفى

ومعاني الإخلاص والوفى

من أشوفها

أشوف النّور

وورود منثوره

وعصافير تغرِّد

شلون أبرد

إستحاله يلمسني بِرد... أبد

أصلا البَرد منك.... إرتعَد

دافيه ملامحك ....وتدفِّي

يوفي وروحي وكفِّي

يصير القلب موَرِّد

شلون أبرِد

يَبرِد اللي يوفه ماحَبْ

اللي مايحـس فيه قلب

ولا إرتعشت أشواقه

وسكن حُبّه بأعماقه

يصير كيان متيَمِّــد

ويَبْـــــــرِد

4/1/2009

الأحد