Friday, May 30, 2008

مشاعر متهورَه



أدَوْرَه... ليش أتعنَّــــــى بس وأَدَوْرَهْ

وهو بعيوني بين الهدب والعيــــــــن

أدوْرَه وبروحي أنواره مْنَــــــــــوْرَه

إحنا روح وحدَه محنا...... روحين

أصلا الدنيا بتواصيفَه..... مِتْصَورَه

لو أغمِّض  ألقاه يهل بدمعتين

أدوره!! لاحشــــــى علي أبد ماأدوره

ههه....... أدوِّر أنا عن مــــاي العين

30/5/2008
الجمعه

Thursday, May 29, 2008

طراره


اعاده لما سبق نشره ليش ...؟ ماأدري 

مادقّوا علي ماعطوني وزاره

ولاحسّوا بإمكانياتي الجباره


ولا رقمي سألوني عنّه


ولا بالغلط عطوني رنّه


ياقاصدينها ياعياره


ماعطوني وزارة


....


ودّي أعرف شنهي المعايير


يبوني أهوّس وإلا أطير


ودي أفهم شنهي المواصفات


يبون ضمير حي وإلا مات


يبون ناس مريشه


وإلا فقاره


ماعطوني وزاره


....


 على الأقل وزارة التخطيط


خل يعطون ويه للزعاطيط


يمكن يلقون فيهم حلول


خل أصبر يمكن أنول


يمكن تنفع الطراره


ماعطوني وزارة


....


 انفع للأعلام والأشغال


يمكن أعدّل أصلح الأعطال


يمكن أسمح لبرنامج للمدونات


يمكن أهدي لشعبي حياة


وتكون بيدي مكامن السّنع


وأسراره


ماعطوني وزارة


31/07/2007
السبت

Tuesday, May 27, 2008

يمدي


لو قضبت سويجك اللحين
ونويت تروح دار المسنين
تبوس راس هذا
وتفرح هذاك
تنادي :
يبا
عمِّي
يَدِّي
وقِلت اهو يوم بيعَدِّي

وإلا روح دار الأيتام
إرسم مع الأطفال أحلام
وقولّهُم إنك أُبوهم
روح روح زورهم
وإشتر هديّه
وعَيِّشْهُم بحلم وردي

وإلا إنوي تروح المستشفى
زورلك طفل ماتعرفه
كَلْمَه .. سِإلَه .. لاعْبَه
سولف معاه وحاربَه
راضَه بلعبَه
وإلا جاكليته
حَسِّسَه إنَّه في بيته
قوله :
أنا يبا
أنا عمِّي
أنا يدّي
روح ترى يمدي
السويج : وينطق حرف الجيم جيما فار سيه وهو المفتاح والقصد هنا هو مفتاح السياره

Friday, May 23, 2008

مبلله





أَتْخَــيَّــــــــــــلـَـــه

نهر يبدي فيه الحب

من أوله

أتخيــــله

قمر ضاوي 

فوق السما

إعتلـــــــى

أتخيـــــــله

...


أضوى الكون بطلته

مـلك  عيون شافته

فرَّح قلب ماتعلم يفرح

علمه إن الزمن مو يجرح

وبس

... فيه لحظات ونس

تهل عالروح بنسايمها

... فيه لحظات ونس

تاخذ نيمه وتضمها


تحس العمر مرتويه أغصانه

وبندى أشواقه

مبــــــــــلله

أتخيــــــــــله

....


غير عن النّاس بأحاسيسه

يخلي اللحظات ونيسه

يجمع همومي وياخذها

شويه لو الروح أخذها

والله كل مافيني

لــــــــــــه

أتخيـــــــله

22/5/2008
الخميس

Tuesday, May 20, 2008

مغرم آلام



رد نام لاتخاف

هذي شهقة عمر

رد نام لاتخاف

هذي ضيجه بالصّدر

لاتحاتي

كمل الأحلام

رد نام

....


فزّيت من ألم بصدري

خوّفتك حبيبي أدري

بس مو بيدي آسف

مثل ماإنت شايف

عمرها مارحمتني الأيام

رد نام

....

يوميّه هذي حالتي

ماأتهنى بنومتي

أفزع على صوت أنّاتي

لاتحاتيني ياحياتي

تدري إني مغرم آلام

رد نام

Wednesday, May 14, 2008

شيخ السعد










أبونا الشيخ سعد

ياريحة هالبلد

إنت أبونا

ماكنت ولي عهد

أبونا الشيخ سعد



لتراب الوطن وفيت

همّك تفرّح كل بيت

إنت في قلوبنا

إنت أبو الكويت

يابو فهد

يايبا الشيخ سعد




شلت همومنا بيوفك ياوفي
كنت لأجل الديره ماتغفي
عطيتنا من راحتك
من صحّتك
كنّا نقول كافي
كنت تقول
إخذوا بعد
يايبا ياشيخ سعد



يبا بقلوبنا لك حفل تكريم
يبا وايد نحبّك والله العظيم
يبا إرتاح تعبت
يبا عمرك مابخلت
يبا يبا
ماننساك أبد
ياشيخ السعد



اغسطس 2006

Monday, May 12, 2008

علامه



يامه

كنت الصدر الوسيع

لي ضاقت فيه أيّامه

يامه

كنت أحضنه بيوفي

ماأعرف إلا  أوفي

كنت ليلي ماأنامه

يامه

....


وشخذيت من اللي سويته

خذلني اللي عطيته

وراح وخلاني

قصّة حب تنقال

يحجون عن وفاي

يحجون عن هواي

يقولون

شهالحب اللي بقلبه

يقولون

كان غير حبه

من كثر شوقي

كانوا يقولون

علامه

يامه

......





هذي تالية اللي يعيش طيّب

بإسم الطيبه

يضحّي بروحه

بإسم الطيبه

يصير حبّه طموحه

ويعيش يوفي

ويتنفّس أشواقه

بإسم الطيبه

يصدق بكل حرف بكلامه

يامه

......


إيه يالدنيا ماخاب الرجا فيج

كنت أدري تالية الهيام ضياع

كنت أدري

تالية اللقا وداع

كنت أدري

إنّي متوهّم

كنت أدري

كنت أدري

وماتفيد الندامه

يامه

Wednesday, May 7, 2008

درل

دائما أنهي إبني عبدالله بأن لا يضع الجل على شعره ، لانني مكتوي بنار الجل ايام المراهقه ، وكلما أشاهد قوطي الجل او علبة الجل اتذكر الأيام الخوالي ، كان كل عاقل أعرفه ينهيني عن استعمال الجل وتصفيف خصلات شعري الحريريه (أخاف بس حريريه ) المهم
شفت العبد يعشق الجل فحبيت أكتبله قصيده بالآثار الجانبيه لإستخدام الجل وهو سائل هلامي يوضع على بصيلات الشعر لكي يتزركش

استمعوا لنصيحة والد أصلع لإبنه يشرح فيه معاناته مع الجل بفتح الجيم

هذي توالي الجل
ماتلقى لصلعتك حل
ينتهي موضوع المشط
لاتروح بعيد وتشط
ماكو شعر
ماكو شعر
لو تييب درِل
هذي توالي الجل
تستاهل تبي تصير رامبو
اللحين ماتستعمل الشامبو
خلاص تحمّل ماصار
صرح الشعر إنهار
وخلّك بالصلع
معتل
هذي توالي الجل
قالولك لاتلطّخ عمرك
دير بالك على شعرك
ماسمعت الكلام
اشبع صلع
لو تلقى الفانوس السحري
وتقوله ابي شعر
يطالعك ويقول
يالله ول
هذي توالي الجل
20/04/2008
الأحد

Tuesday, May 6, 2008

الأغلبيه الصامته




الأغلبيه الصامته


ناس شايفه وساكته

ماودها تشاركنا

بحفلة الزار الجماعيه

ماودها تتكلّم

كافيها ضيم الدنيا

أنوارها موجوده

بس خافته

الأغلبيه الصامته

.....

تشوف من بعيد واقعنا

ودها تآزرنا

بس 

يأسها تمكّن منها

والبرود سكنها

تخاف تقرّب

تستاحش تجرّب

الكل منهم رافع جامته

الأغلبيه الصامته

....


تبي الحياة البيت والدّوام

بدون أحلام تنام

ليش تشارك

والوضع متشابك

وأصول الغلط

ثابته

الأغلبيه الصامته

....


ماتحب لوية الإنتخابات

مايهمها التغيير بالحياة

جامده والجمود منها متمكّن

همها وين تاكل ووين تسكن

وكل واحد حر بحياته

الأغلبيه الصامته

24/4/2008
الخميس

Sunday, May 4, 2008

إنت تروي



إنت تروي

من أشوفك

أعتلي فوق السّحاب

ماأشوف إلا

مطر

ونورك يضوي

إنت تروي

،،،،

 أشوفك أحس الدنيا متغيره

تاخذ مني حزني وتطيره

تنسّيني شقى أيّامي

تنهي فيني آلامي

تصير على همومي

متقوّي

إنت تروي

،،،،


أجيك والوله تناصف روحي

أجيك مو طايجتني جروحي

أرد فرحانه عيني

ماأدري شتسوّي فيني

ماأدري شتسوّي

إنت تروي

الاحد
4/5/2008